петок, 19 април 2024

ВМРО-ДПМНЕ: Зошто за фабриката за електрични автомобили имаше анекс пред само два месеци?

 

Објавено на

часот

Сподели

„Најавуваа почеток на градба на фабриката во рок од 6 до 8 недели, а производството требаше да почне оваа година со 30.000 автомобили на годишно ниво. Па зборуваа за ефект на снежна топка кој требало да донесе други инвеститори. Не 8, туку 80 недели поминаа, а фабриката никаде ја немаше. Истите што фрлаа лопати и се фалеа, почнаа невешто да се вадат дека се спојуваат парцели, па урбанистички планови, па катастарски лавиринти, за на крај сега да стане јасно дека ја лажеле јавноста. Оваа власт е неспособна да привлече инвеститори, ама тоа наместо да го признаат, се обидуваат да го прикријат со вакви потемкини села. Државата дури и се обврза да ги помогне со народни пари, а според информациите во јавноста во извештајот на Комисијата за заштита на конкуренцијата било нотирано одобрување на државна помош од 42.585.856 милиони евра.

Ај што нема ни инвестиција, ни бутур, ај што потрошија пари за помпезна прослава за фрлање лопати во една дупка, туку барем оваа одобрена државна помош да не ја изело помрачина. Премногу лажеше оваа власт на ДУИ и СДС за овој случај за да им се верува на ‘чесен збор’. Впрочем Власта треба да одговори зошто на толкаво одложување пред само два месеци, на пет дена пред новата 2024 година Владата на ДУИ и СДС дала согласност Дирекцијата за технолошки индустриски развојни зони да потпише анекс кон договорот за доделување државна помош склучен со инвеститорот „Некст.е.ГО мобиле“ во август 2022 година? Кога веќе цели две години нема ништо друго освен едната дупка на ливадата близу Тетово, зошто бил склучуван овој анекс?

ВМРО-ДПМНЕ не е финансиска полиција ниту која било друга надлежна институција која треба да испитува сомнежи за криминал. Ако СДС како партија прават и правеле увиди во документи и експресно судат врз основа на методи на преки суд, тогаш тоа говори за нивното познавање на правната држава и владеењето на правото. Ние ги повикуваме органите на државата детално и суштински да се позанимаваат со овој случај, а не само површно, и да проверат дали и колку е оштетена Македонија од оваа ‘голема инвестиција’ која пукна како меур од сапуница“, соопшти ВМРО-ДПМНЕ.

ТОП ВЕСТИ

ПОСЛЕДНИ ВЕСТИ