Уставниот суд денеска одлучи да не поведе постапка за оценување на уставноста и законитоста на измените на скопскиот Детален урбанистички план (ДУП) Буњаковец 2 во кој влегува земјиште со вкупно 15 парцели околу поранешната фабрика „Треска“.
Еве ја реакцијата на Шанса за Центар:
„На здравје нека се во Буњаковец: над 1 милион м2 бруто изградена површина за домување наместо 400.000 што ги дозволува ГУП-от; над 60% изграденост за домување наместо 22% колку што дозволува ГУП-от; над 33.000 жители наместо 12.500 колку што дозволува ГУП-от; над 9.300 просечен број на семејства наместо 3.400 колку што дозволува ГУП-от; 0,36 м2 зеленило по жител или ич; густина на изграденост со планираните висини со кои не се обезбедува минимален стандард за нормално хумано живеење или доволна аерација и минимални 2 часа осонченост; уште подолги листи за чекање за запишување во градинка, училишта…
На здравје нека се „наполитанките“. Кој сака да прочита повеќе зошто планот по кој се продава земјата и почнува да се гради кај „Треска“ може да се преземе елаборатот за суспензија изработен од стручната служба на Општина Центар“.
Во денешното кусо соопштение од Уставниот суд е наведено дека по спроведената уставно-судска анализа и прибавената документација за овој предмет Судот оцени дека наводите во иницијативата се неосновани, односно дека оспорената одлука е донесена во согласност со тогаш важечкиот Закон за просторно и урбанистичко планирање.
На земјиштето на поранешната фабрика „Треска“ има 15 парцели. Како сопственици се јавуваат и три градежни фирми, Ремис од Охрид, Голден Арт и Мега акустик од Скопје.
