Во јули, Украина усвои закон за поместување на прославата на 25 декември, денот кога поголемиот дел од христијанскиот свет го слави Божиќ. Претседателот Володимир Зеленски потпиша закон во кој се вели дека Украинците сакаат „да го живеат сопствениот живот со свои традиции и празници“.
Тоа им овозможува „да го остават зад себе руското наследство со наметнувањето на прославата на Божиќ на 7 јануари“, додаде тој.
Христијанството е најголемата религија во Украина, а Руската православна црква доминираше во верскиот живот до неодамна. Како и Руската православна црква, источнохристијанските цркви генерално го користат јулијанскиот календар, кој датира од римско време, наместо грегоријанскиот календар што се користи во секојдневниот живот.
Промената на датумот е дел од забрзаните напори за отстранување на трагите од руското и советското влијание, како што се преименување на улиците и отстранување на споменици.
Православната црква на Украина, нова независна црква која за прв пат одржа богослужба во 2019 година, го смени датумот на Божиќ на 25 декември. Официјално се одвои од Руската православна црква поради руската анексија на Крим во 2014 година и поддршката на таа земја за сепаратистите во источна Украина. Новата православна црква на Украина рапидно расте и презема неколку црковни згради поврзани со Русија со потези поддржани од владата.
Во меѓувреме, Украинската православна црква, историски поврзана со Русија, ја задржа прославата на Божиќ на 7 јануари. Иако тврди дека ги прекинала врските со Русија поради војната, многу Украинци на ова гледаат со скептицизам.
Третата православна деноминација во земјата, Украинската грчкокатоличка црква, на 25 декември ќе одржи Божиќна миса. Украина е под духовно водство на Москва од 17 век.
За време на Советскиот Сојуз и промовирањето на атеизмот, божиќните традиции како што се украсувањето на новогодишна елка и давање подароци биле пренесени на новогодишната ноќ, која стана главен празник и сè уште е за многу семејства.
Украинските божиќни обичаи вклучуваат вечера на Бадник со 12 јадења без месо, вклучително и сладок пудинг од житарици – кутја. Украинците ги украсуваат своите домови со снопови пченица. Во некои области, децата одат од врата до врата пеејќи песни.
