Руските сили се обидуваат да се пробијат во тој регион, што предизвика тревога во Киев и кај западните сојузници за потенцијална голема офанзива врз градот Харков, вториот по големина во Украина, кој се наоѓа на само триесетина километри од руската граница.
„Непријателот моментално постигнува тактички успеси“, објави украинскиот Генералштаб во понеделник наутро.
По освојувањето на неколку села во областа Харков, во моментов се водат борби во близина на градот Вовчанск, кој се наоѓа на само пет километри од руската граница, пишува дпа.
Украина тврди дека Русија трпи големи загуби, но дека и покрај тоа испраќа бројни сили во Вовчанск, кон кој се движат пет баталјони. Русија веќе го окупираше Вовчанск на почетокот на војната. Се повлече по украинската офанзива во есента 2022 година.
Русија го започна новиот пробив кон регионот Харков на 10 мај. Во последните два дена освои девет села, тврди руското Министерство за одбрана.
Регионалниот шеф на Харков Олех Синиехубов рече дека Русија намерно се обидува да ја растегне линијата на фронтот напаѓајќи во мали групи во нови насоки.
За локалната телевизија изјави дека украинските сили ги задржуваат руските војници, но предупреди дека борбите би можеле да се прошират во нови населби, пренесе Ројтерс.
Речиси 6.000 луѓе се евакуирани во регионот, рече тој, додавајќи дека 30 населени места биле погодени со минофрлачи или артилериско гранатирање.
Иако се смета дека со овој руски прекуграничен упад сè уште е малку веројатно да може да се заземе Харков, нивниот постепен пристап на оваа нова, североисточна линија на фронтот само ја зголемува вознемиреноста кај оние што живеат таму.
Фрустрирани украински војници за Би-би-си изјавија дека првично руските војници едноставно можеле да „влезат“ во регионот поради недостаток на одбрана.
