Македонија вечерва беше дел од историја, нашиот меч против Франција беше најпосетуван ракометен натпревар во историјата на оваа игра, тоа беше и прв дуел на Европските првенства кој се играше на фудбалски стадион.
Имавме одличен старт на натпреварот, 20тина минути перфектно се носевме со силната Франција, имавме предност од 10-8 и напад за три разлика кој не го реализираше Филип Кузмановски.
Следуваше тајмаут на Франција по кој значително се сменија работите. Македонија влезе во црн период, Французите направија серија од 6-1 и поведоа со 14-11. На полувремето нивното водство изнесуваше 17-13.
Во второто полувреме Франзуците рутински го играа натпреварот, силите на теренот беа јасни, противникот беше многу подобар од Македонија. На крајот Франција славеше со 39-29.
Најефикасен во составот на Македонија беше Жарко Пешевски со седум голови, Џонов постигна шест, Кузмановски четири, Талески, Лазаревски и Митев по три. Митревски го заврши мечот со девет одбрани. Во составот на Франција Иго Деска имаше седум од седум, Наи даде шест, а Мем пет.
Мечевите од нашата група се селат во Берлин, следниот предизвик е против домаќинот Германија на 14. јануари.
