Доналд Трамп за време на неговиот прв мандат сакал да ги повлече Соединетите Држави од НАТО, но високи претставници на администрацијата постојано го убедувале да не го прави тоа.
Сепак, пред евентуалниот втор мандат во Белата куќа, републиканскиот претседателски кандидат веќе навестува дека тоа би можел да го направи доколку НАТО не ги исполни неговите барања, пишува Ролингстоун.
Тој и неговите сојузници, исто така, ја разгледуваат опцијата во која САД драматично би ја намалиле својата активност и би биле во, како што самиот Трамп рече, „стендбај“ позиција во НАТО.
Кога поранешниот претседател оваа година приватно разговараше за улогата на САД во трансатлантската воена алијанса, тој јасно стави до знаење дека не сака „љубители на НАТО“ на високи позиции во неговата втора администрација, според магазинот.
Поранешниот претседател ги даде тие коментари за Северноатлантската алијанса за време на дискусија за тековниот конфликт во Украина.
Според изворите, Трамп продолжил да ја изразува својата отвореност за целосно повлекување на САД од НАТО. Но Трамп посочи дека тоа би можело да се избегне доколку сојузот – кој некогаш славно го нарече „застарен“ – попушти пред неговите најнови барања.
Тие ги вклучуваат неговите желби другите членки драстично да ги зголемат трошоците за одбрана, како и преиспитување на основниот принцип дека нападот врз еден член е еднаков на напад врз сите.
Кога беше на функцијата, Трамп постојано се потсмеваше со клаузулата за колективна одбрана од Северноатлантскиот договор, позната како Член 5. Еден поранешен висок функционер на администрацијата се сеќава на еден момент во Овалната соба во средината на 2018 година, кога тогашниот претседател почнал да чита од пишаниот список на помали земји на НАТО, од кои за некои тврдел дека повеќето Американци никогаш не ни слушнале.
Трамп тогаш рекол дека „почетокот на Третата светска војна“ поради суверенитетот на некои од овие земји нема апсолутно никаква смисла и дека тој не треба да биде принуден автоматски да испраќа американски војници во каква било слична криза.
