Тој најави дека првата од неговите извршни наредби ќе биде прогласување вонредна состојба на јужната граница.
„Нелегалното влегување ќе биде запрено и ќе почнеме да враќаме милиони криминалци таму од каде што дошле.“
Тој рече дека ќе испрати војници на јужната граница за да спречи „катастрофалната инвазија на нашата земја“.
Тој најави дека и наркокартелите ќе ги прогласи за странски терористички организации.
Трамп рече дека од денеска официјалната политика на американската влада ќе биде да има само два пола – машки и женски.
„Ќе ги запрам мерките со кои прашањето за полот и расата се вплеткуваат во секоја пора на општеството. Ќе се бориме за општество што не гледа боја на кожата и кое ќе биде засновано на заслуги.“
Тој рече дека ќе нареди Мексиканскиот залив да се преименува во „Заливот на Америка“ и дека планината Денали на Алјаска повторно ќе се нарекува планина Мекинли, по 25-тиот американски претседател Вилијам Мекинли, кој е роден во Охајо и убиен во почетокот на неговиот втор мандат.
Трамп најави дека САД ќе ја вратат контролата врз Панамскиот канал.
„Кина го контролира Панамскиот канал, а ние не им го дадовме ним, туку на Панама. Сега го враќаме“.
Трамп, исто така, рече дека „инфлациската криза е предизвикана од масовната прекумерна потрошувачка и ескалацијата на цените на енергијата“ и најави дека ќе му наложи на својот кабинет да ги искористи „огромните овластувања со кои располага“ за да ги намали цените на стоките.
