Ангел Стојчев претседател на здружението Овчеполски фармер денеска изјави дека доколку до утре немаат одговор, во тој случај во четврток излегуваат на протести, со своите трактори ќе блокираат патишта и улици во Свети Николе. Посочува дека бројот на земјоделци на кои не им продолжен договорот за закуп на земјоделско земјиште е поголем од 88.
„Ние сакаме да ни ги продолжат договорите со анекс договор на 15 години. Секое ново продолжување значи и изложување на големи трошоци, само еден елаборат чини од 30.000 до 40.000 денари, па внесувањето во Катастар таму чини некаде околу 12.000 денари. Сѐ е зголемено“, изјави денеска за МИА, Стојчев.
Тој посочува дека станува збор за земјоделци кои имаат под закуп од 10 до 20 хектари, а на земјиштето веќе се посеани земјоделските култури. На ова земјиште се произведува пченица, јачмен, пченка, детелина и бостан. Во моментов на овие земјоделци не им следуваат и субвенции, бидејќи договорите за закуп не им се продолжени.
