„Америка за првпат предложи двата преговарачки тима — Украина и Русија — да се сретнат во Соединетите Американски Држави, веројатно во Мајами, за една седмица. Ние го потврдивме нашето учество“, рече тој.
Од Вашингтон и Москва немаше веднаш коментар, но американскиот претседател Доналд Трамп притиска за завршување на конфликтот уште од кога повторно стапи на функцијата пред повеќе од една година, вели Би-би-си.
Во меѓувреме, Русија ги продолжи нападите врз енергетската инфраструктура на Украина, предизвикувајќи нови масовни прекини на струја во услови на екстремен студ.
Во саботата Зеленски им кажа на новинарите што се случувало за време на втората рунда мировни разговори посредувани од САД во Абу Даби, кои завршија во петокот без информации за напредок.
Зеленски рече дека „тешките прашања останаа тешки“, вклучително и територијалните отстапки што Украина е под притисок да ги направи.
Тој наведе дека страните, за првпат, разговарале за можноста за трилатерална средба меѓу лидерите, а не само меѓу претставници, но предупреди дека „се потребни подготвителни елементи за тоа“.
Запрашан дали бил зададен временски рок за договор, украинскиот лидер одговори: „Американците велат дека сакаат сè да завршат до јуни.“
„Зошто пред ова лето?“, додаде тој. „Разбираме дека нивните внатрешни прашања во САД ќе имаат влијание.“ Тие прашања ги вклучуваат ноемвриските меѓуизбори, кои би можеле да го променат односот на силите во американската власт.
Додека дипломатијата продолжува, продолжуваат и руските напади врз енергетските капацитети на Украина.
„Руските криминалци извршија уште еден масовен напад врз енергетските капацитети на Украина“, напиша украинскиот министер за енергетика Денис Шмихал на Телеграм.
Целта беа трафостаници, кои го контролираат протекот на електрична енергија, и надземни далноводи што „го сочинуваат ’рбетот на електроенергетската мрежа на Украина“, рече Шмихал. Нападнати биле и електрани.
Државниот енергетски оператор Укренерго соопшти дека „дефицитот на електрична енергија во енергетскиот систем на Украина значително се зголеми“ како резултат на најновите напади.
Шмихал изјави дека од соседна Полска била побарана итна испорака на електрична енергија.
Зеленски напиша на социјалните мрежи дека нападот во петокот навечер вклучувал повеќе од 400 дронови и 40 ракети. Системите за противвоздушна одбрана пресретнале поголем дел, но не сите, соопшти украинската војска.
„Главните цели беа електроенергетската мрежа, производствените капацитети и дистрибутивните трафостаници“, рече тој, додавајќи дека штети биле пријавени во најмалку четири региони.
Во западниот регион Лавов, електраната Добротвир била нападната, оставајќи илјадници луѓе без струја, според регионалниот претставник Максим Козиќки.
Најмалку 6.000 лица останале без електрична енергија поради рестрикции, додаде тој.
Електраната Бурштин била погодена и во соседниот регион Ивано-Франковск.
Компанијата ДТЕК, која управува со електраните Добротвир и Бурштин, соопшти дека ова бил десеттиот „масовен напад“ врз нејзините електрани од октомври 2025 година.
„Вкупно, термоелектраните на ДТЕК биле нападнати од непријателот повеќе од 220 пати од почетокот на целосната инвазија“, додаде компанијата на Телеграм. Инвазијата ја започна Русија пред речиси четири години.
Едно лице е пријавено како загинато во регионот Ривне, а неколкумина биле повредени во Запорожје. Претставникот на Ривне, Олександр Ковал, рече дека има и штети на домови и „критична инфраструктура“.
Во Киев, жителите повторно побараа засолниште во метростаниците. Меѓу нив, Оксана Кихтенко ѝ изјави на новинската агенција Ројтерс: „Тие нè тераат да живееме во нечовечки услови. Без греење, без струја.“
Напад со дрон во градот Јахотин, на околу 10 километри оддалеченост, предизвикал пожар во магацински комплекс, соопштија украинските служби за вонредни состојби.
Украина исто така ја нападнала Русија, погодувајќи фабрика што произведува компоненти за ракетно гориво во западниот регион Твер, според медиумски извештаи што се повикуваат на украински безбедносни извори.
Подалеку на југ, во регионот Саратов, било погодено и нафтено депо, соопшти Украина.
Русија не коментираше за најновите напади.
Москва ги обнови нападите врз украинската енергетска инфраструктура во понеделникот, по паузата што американскиот претседател Доналд Трамп побарал Владимир Путин да ја почитува поради жестокиот студ во Украина. Трамп рече дека паузата траела една седмица, до минатата недела, но Киев го оспори тој временски распоред.
ДТЕК соопшти дека комбинираните ракетни и дрон-напади го предизвикале „најмоќниот удар“ врз инфраструктурата досега оваа година.
„Москва мора да биде лишена од можноста да го користи студот како средство за притисок врз Украина“, напиша Зеленски во саботата на Икс, реагирајќи на најновите напади.
Русија, исто така, ја обвини Украина дека не е сериозна во обезбедувањето траен мир. Министерот за надворешни работи Сергеј Лавров во петокот ја обвини Украина за пукањето врз генерал на руската војска, велејќи дека тоа било насочено кон „попречување на преговарачкиот процес“.
Сè уште не е познато кој стои зад пукањето.
Околу 55.000 украински војници се убиени од почетокот на целосната руска инвазија во февруари 2022 година, изјави Зеленски претходно оваа седмица. Би-би-си ги потврдило имињата на речиси 160.000 лица загинати борејќи се на руската страна во Украина.
