„Благодарение на овој контролиран извоз, ќе продолжиме да произведуваме беспилотни летала за бојното поле“, рече Зеленски во вечерната видео порака. Домашното производство на одредено оружје веќе ја надмина побарувачката, рече тој.
„Еден од примерите се поморските беспилотни летала на кои светот се потпира, а ние ги имаме премногу, како и противтенковско оружје и некои други видови (оружје)“, истакна Зеленски.
Сепак, приоритет ќе продолжи да биде испораката на оружје на првата линија на фронтот и обновувањето на украинскиот арсенал.
Концептот за извоз ќе биде развиен во текот на следните две недели.
„САД на прво место“
За Украина, извозот и соработката со Соединетите Американски Држави ќе бидат на прво место, по што ќе следат испораките до европските партнери, а потоа и другите земји заинтересирани за украинско оружје, кои досега му пружија поддршка на Киев.
„Украина нема да го дистрибуира своето оружје како „милостина“ на оние на кои не им беше грижа за Украина“, рече Зеленски, а пренесе Хина.
Извозот е подложен на „веродостојни проверки“ за да се осигура дека „украинските технологии“ нема да завршат во руски раце или во рацете на руските сојузници.
Украина се брани од руската инвазија повеќе од три и пол години и за тоа време доби невидено ниво на финансиска помош и испорака на оружје од западните сојузници, забележува ДПА.
