„Присуство на руско државјанство е потврдено за одредени лица. Одлуката е потпишана“, објави денес Зеленски, без директно да го спомене името на градоначалникот на Одеса. Сепак, извори од безбедносните сили потврдиле за украинските медиуми дека одлуката се однесува на Труханов, како и на балетскиот танчер Сергеј Полунин и поранешниот политичар Олег Царев, кои живеат во Русија и отворено ја поддржуваат агресијата против Украина.
I held a meeting on the security situation in some of our regions – these are matters of principle.
Head of the Security Service of Ukraine Vasyl Maliuk reported on countering Russian agent networks and collaborators in the frontline and border regions, as well as in the south… pic.twitter.com/MxKyKjPYc9
— Volodymyr Zelenskyy / Володимир Зеленський (@ZelenskyyUa) October 14, 2025
Труханов, кој за разлика од нив живее во Украина, најави дека ќе се жали на суд. Веста следи по повеќедневните шпекулации за овој потег, при што градоначалникот истовремено предупреди на „провокации“ и негираше поседување руски документи.
Информацијата дека Труханов има руско државјанство циркулира од 2014 година. Украински новинари, повикувајќи се на добиени документи, тврдеа дека градоначалникот имал таков пасош во минатото. Откако повеќе пати тоа го негираше, неговиот пасош бил поништен од руски суд во 2017 година поради наводни процедурални грешки, а Труханов тврдеше дека дознал за тоа преку интернет.
Една година подоцна, Проектот за известување за организиран криминал и корупција (ОЦЦРП) објави копија од неговиот руски пасош и офшор документи кои покажувале дека е пријавен како жител на градот Сергиев Посад во Московскиот регион.
Минатата година активистот Серхиј Стерненко објави документи со кои наводно се потврдува дека Труханов сè уште има руско државјанство. Податоците, наводно, укажуваат дека лице со исто име аплицирало за отворање банкарска сметка во Русија само неколку недели пред почетокот на конфликтот.
Труханов (60) е на чело на Одеса од 2014 година и е реизбран двапати. Неговата кариера е обележана со бројни скандали, вклучително и обвинувања за корупција, но досега успеал да избегне смена. Со години се сметаше за проруски политичар, но по почетокот на конфликтот се профилираше како украински патриот. И покрај ова, тој се спротивстави на отстранувањето на спомениците од советската ера и преименување на улиците како дел од дерусизацијата.
Во 2018 година тој беше обвинет за проневера на 2,2 милиони долари за време на купувањето на зграда на фабриката Крајан за градската администрација по надуена цена. Иако судот во Одеса го ослободи од обвинение во 2019 година, пресудата беше поништена во 2021 година, а случајот беше повторно отворен.
Одлуката за одземање на државјанството доаѓа само неколку недели откако катастрофални поплави ја погодија Одеса, при што загинаа најмалку 10 лица. Локалните власти се соочија со критики за лошо справување со кризата. „Сè мора да се прави доследно и праведно. И ние ќе се справиме со ситуацијата во Одеса“, кажа Зеленски пред три дена.
Украинскиот устав забранува двојно државјанство, но во исто време гарантира дека не може да му се одземе на украински граѓанин. Сепак, му дава на претседателот овластување да го додели или одземе. Губењето на државјанството е основа за отстранување од јавна функција, вклучително и од градоначалничка. Во овој случај функцијата ја презема секретарот на градскиот совет, кој моментално е Ихор Ковал, член на партијата Слуга на народот на Володимир Зеленски.
За време на воена состојба претседателот има и овластување да спостави градска воена администрација, а Зеленски веќе му наредил на врховниот командант на војската Александар Сирски да ја испита таа можност.
