Четирите години војна со Русија му овозможија на Киев да развие уникатно искуство во пресретнување на дронови, вклучувајќи ги и иранските беспилотни летала „шахед“ кои моментално се користат во напади врз земји како што се Обединетите Арапски Емирати, Катар и Саудиска Арабија, рече денес Зеленски.
„Би го предложил следново: лидерите на Блискиот Исток имаат добри односи со Русите“, изјави Зеленски во телефонски разговор за Блумберг од Киев. „Можам да побарам Русите да спроведат едномесечно примирје.“
Откако ќе стапи на сила прекинот на огнот, „ќе ги испратиме нашите најдобри оператори за пресретнување на беспилотни летала на Блискиот Исток“, рече тој. Додаде дека може да се прогласи примирје и на два месеци или на две недели, „за да можеме да им помогнеме на земјите од Блискиот Исток да ги заштитат цивилите“.
Зеленски ја даде понудата откако градови низ Блискиот Исток, вклучувајќи го и Дубаи, беа цел на ирански напади со беспилотни летала и ракети во текот на викендот. Така, Техеран возврати на американските и израелските воени напади во кои беа убиени врховниот лидер ајатолахот Али Хамнеи и други високи функционери.
Русија постојано ги отфрла повиците на американскиот претседател Доналд Трамп за прекин на огнот во Украина, додека Вашингтон се обидуваше да посредува во мировен договор. Не е јасно зошто Путин би се согласил на таков предлог сега.
Во понеделник, рускиот претседател одржа серија телефонски разговори со лидерите на земјите од Заливот погодени од иранските напади, вклучувајќи ги Бахреин, Обединетите Арапски Емирати и Катар. Портпаролот на Кремљ, Дмитриј Песков, им рече на новинарите дека Москва е исто така „во постојан контакт со иранското раководство“.
„Сигурно е дека ОАЕ, Саудиска Арабија и Катар имаат добри односи, првенствено економски, со Путин“, рече Зеленски. „Можеме да му помогнеме на Израел на ист начин“.
