На прашањето на новинарите што би се случило доколку Кремљ ги отфрли договорите финализирани од Украина, САД и Европа, Зеленски одговори со обид за хумор.
„Ако (рускиот претседател Владимир) Путин отфрли сè, тогаш ќе го имаме она што ни се случува во моментов во авионот – турбуленции. Ова навистина се случува сега“, се пошегува тој. „Но, не е толку сериозно во споредба со војна, се разбира. И во споредба со она што би се случило доколку Путин ги уништи сите дипломатски можности и подготвеност на Украина, Европа и САД“.
Зеленски објасни дека во тој сценарио би било логично САД да го зголемат притисокот врз Русија и да ја прошират воената помош за Украина.
„Мислам дека Америка би извршила притисок со санкции и би ни обезбедила повеќе оружје ако тој одбие сè. Мислам дека тоа би било фер барање од наша страна до Американците. Бидејќи, според мене, логиката е следната: ако Американците се подготвени да обезбедат безбедносни гаранции за Украина и да применат силни гаранции ако Путин ги прекрши, тогаш кажете ми искрено како ова се разликува од ситуацијата во која Путин едноставно не сака да ја заврши војната?“, кажа Зеленски.
„Верувам дека би било фер барање од мене како претседател и од некои европски лидери да ни дадат барем дел од тие гаранции за да можеме да се одбраниме од Путин. Противвоздушна одбрана и оружје со долг дострел“, заклучи тој.
За време на брифингот Зеленски откри дека по разговорите ќе бидат формализирани пет документи поврзани со безбедносните гаранции и реконструкцијата на земјата. Тој истакна дека е постигнат „сериозен напредок“ во однос на гаранциите и го повтори цврстиот став на Украина дека нема да се согласи со законско или фактичко признавање на Донбас како руска територија. Во меѓувреме, американските медиуми, повикувајќи се на свои извори, наведуваат дека Вашингтон верува оти „90 отсто од несогласувањата“ меѓу Украина и Русија се веќе решени.
