„Ако Русија постави услов нашите војници да се повлечат од нашата земја, тоа значи дека тие не сакаат прекин на огнот ниту крај на војната“, рече Зеленски вчера, откако американскиот претседател Доналд Трамп разговараше по телефон со својот руски колега Владимир Путин.
„Москва го разбира ова“, рече Зеленски, нагласувајќи ја улогата на украинската војска во заштитата на својата територија. Русија постојано повторува дека нејзиното барање во мировните преговори е силите на Киев да се повлечат од четирите украински региони, Донецк, Луганск, Запорожје и Херсон, врз кои Русија нема целосна контрола.
Зеленски потврди дека Трамп го контактирал еднаш пред разговорот со Путин и еднаш, заедно со европските лидери, по разговорот со рускиот претседател. По телефонскиот разговор со Путин, Трамп изјави дека преговорите меѓу Русија и Украина ќе започнат „веднаш“.
Украинскиот лидер изрази отвореност за понатамошни преговори на високо ниво со Русија, САД и европските земји, додавајќи дека овие состаноци би можеле да се одржат во Турција, Ватикан или Швајцарија.
Зеленски рече дека сега очекува детали за меморандумот што Путин го спомена по повикот. Путин во соопштение за медиумите по телефонскиот разговор изјави дека со меморандумот ќе се постави временска рамка и принципи за мирно решавање на конфликтот, вклучително и евентуален прекин на огнот.
