Според западните медиуми, годинашнава парада била значително поголема од минатите години.
„Мислам дека пред две години имаше помеѓу 7.000 и 8.000 припадници на вооружените сили“, јави дописникот на Скај њуз од Москва. „Оваа година имаше околу 11.500.“
Меѓу дваесетте светски лидери што присуствуваат се српскиот претседател Александар Вучиќ и кинескиот претседател Си Џинпинг, додека од лидерите на Европската Унија пристигна само словачкиот премиер Роберт Фицо.
Рускиот претседател Владимир Путин одржа краток говор за време на парадата, а настанот беше обележан со ригорозни безбедносни мерки. Парадата заврши со прелет на авиони.
Почетокот на парадата беше означен со биење на камбаните над кулата Спаскаја. Националното знаме на Руската Федерација и знамето на Советскиот Сојуз беа донесени на Црвениот плоштад во придружба на оркестар.
Парадата ја командуваше врховниот командант на копнените сили на Руската Федерација Олег Саљуков.
На Црвениот плоштад има три штанда во боите на руското знаме, а централниот се наоѓа пред мавзолејот на Ленин и е наменет за лидерите и високите претставници на странски земји, кои Путин ги покани на прославата на 80-годишнината од капитулацијата на нацистичка Германија во Втората светска војна.
Според агенцијата Тасс, на десната и левата трибина седат воените ветерани и почесните гости.
На постарите гости, од кои многумина се над 90 години, да се искачат до трибините им помагаа активисти од организацијата „Победнички волонтери“.
На воената парада присуствуваа повеќе од 11.500 војници на руското Министерство за одбрана и други безбедносни структури – ФСБ, Министерството за внатрешни работи на Русија и Руската гарда, како и возила од други земји учеснички во војната.
Прво, покрај трибината каде што беа претседателот на Русија Владимир Путин и 29 светски лидери поминаа пешадиските парадни машини, како и кадетите од воените училишта.
На парадата учествуваа и Козаци претставени од парадната единица на кубањскиот козачки полк, воени извидници, деминери, пилоти, морнари, кадети од воени училишта и академии од цела Русија, полкот на Руските воздухопловни сили, како и академии за воено инженерство и други воени академии. За време на парадата, гледачите имаа можност да видат повеќе од 130 единици воена опрема, ракетни системи „Искандер“, системи за противвоздушна одбрана, како и најнова техника.
Строги безбедносни мерки
На Црвениот плоштад беа воведени посебни безбедносни мерки, а според репортерот на РТС, дури и на новинарите им беше забранет пристапот до таа зона. Дури и пристапот до прес-центарот е многу ригорозен. Вучиќ и шефовите на другите делегации беа пречекани во Кремљ од Путин, на кого српскиот претседател му се заблагодари за гостопримството. „Путин само рече: Стигна! Мојот одговор беше: Ви благодарам за гостопримството и среќен празник“, напиша Вучиќ на Инстаграм.
Парадата се одржува четврта година во сенката на конфликтот во Украина, пишува агенцијата Франс прес и потсетува дека Путин наредил прекин на огнот од 8 до 10 мај, во време кога се слави победата над нацистичка Германија во Втората светска војна, а чија кулминација е голема воена парада пред ѕидините на Кремљ.
Сепак, Украина, која се соочува со руска офанзива од 2022 година, вчера ја обвини Русија дека ја напаѓа по целата фронтовска линија, посочувајќи на стотици прекршувања на прекинот на огнот.
Руската војска, од друга страна, изјави дека строго го почитува прекинот на огнот и дека „реагира“ само на украинските прекршувања.
Улиците на Москва се украсени со многубројни знамиња за оваа пригода. Многу продавници и ресторани се прекриени со постери на кои пишува дека се сеќаваат на победата во 1945 година и дека се горди.
Франс прес посочува дека од вторник, Украина ја напаѓа Русија со дронови, вклучувајќи го и главниот град, што предизвика одложување или откажување на стотици летови. Денес, како што објави Франс прес, ситуацијата е мирна, а небото е ведро со малку облаци.
Кремљ соопшти дека се преземени сите потребни мерки за да се обезбеди безбедноста на прославата, вклучително и ограничување на пристапот до интернет заради онеспособување на беспилотните летала.
Украинскиот претседател Володимир Зеленски ја критикуваше воената парада на Црвениот плоштад и оцени дека секое странско учество е поддршка за рускиот агресор.
Покрај дваесетте лидери присутни во Москва, на парадата учествуваа војници од 13 земји, вклучувајќи ги и оние од Кина, Виетнам, Мјанмар и Египет.
За време на вечерата во чест на шефовите на странските делегации поканети на прославата по повод 80-годишнината од Денот на победата во Втората светска војна, Путин наздрави за победата, мирот и просперитетот, наведувајќи дека 9 мај е свет датум за мултинационалниот народ на Русија.
Путин и кинескиот претседател Си Џинпинг во Кремљ потпишаа заеднички документ за глобална стратегиска стабилност.
Вучиќ денес треба да има билатерални средби со претседателите на Русија и Кина.
Синоќа, како што порача на Инстаграм, имал „братска средба“ со словачкиот премиер Фицо. „Србите и Словаците се браќа засекогаш“, напиша Вучиќ на Инстаграм.
