Се очекува масовен одѕив на наставници, ученици, транспортни работници, таксисти и индустриски работници, додека речиси 80.000 полицајци ќе бидат распоредени за да обезбедат јавен ред и да спречат немири.
Францускиот министер за внатрешни работи, Бруно Ретајо, испрати телеграма до префектите низ цела Франција во која ги наведува насоките и целите за обезбедување јавен ред за време на претстојните протести.
Ретајо посебно предупреди на потенцијални закани од крајно левичарски групи, кои би можеле да се обидат да се инфилтрираат во официјалните демонстрации, нагласувајќи дека постои „значаен ризик од нарушување на јавниот ред“.
Францускиот министер побара префектите да гарантираат „фундаментална слобода на демонстрации“, а воедно да обезбедат закон и ред.
Тој ја нагласи важноста од користење соодветни средства за идентификување и притворање на лица што би можеле да бидат осомничени за насилно однесување.
Ретајо нагласи нулта-толеранција за каква било штета на јавни или симболични згради, вклучувајќи ги парламентарните собранија и седиштата на извршната и судската власт.
Според извештајот на БФМ, властите регистрирале околу 250 најавени собири низ Франција од вчера.
Секторите како што се државната служба, транспортот и земјоделството, вклучувајќи ја и Конфедерацијата на селани, особено во регионите како што се Морбијан, Ер, Ош и Тур, се активни на социјалните медиуми и повикуваат на учество во протестите.
Денот на социјална мобилизација беше најавен на крајот на август како одговор на мерките за штедење на буџетот предложени од поранешниот министер за финансии Франсоа Бајру.
Мерките предизвикаа отпор од синдикатите, кои изразуваат незадоволство од намалувањето на социјалните права.
На претходниот протест, одржан на 10 септември, се собраа речиси 197.000 луѓе, според Министерството за внатрешни работи.
Организаторите очекуваат утре, 18 септември, да се одржат многу повеќе маршеви отколку за време на претходните протести.
