Во рамките на посетата на регионот, по престојот во Подгорица, Штокер денес во Белград се сретна одделно со премиерот Ѓуро Мацута, а потоа и со претседателот Вучиќ.
Тој нагласи дека Австрија е трет најголем инвеститор во Србија, каде што работат повеќе од 800 австриски компании и се создадени околу 25.000 работни места.
Австрискиот канцелар кажа дека „сите земји на Западен Балкан припаѓаат на европското семејство“ и дека е важно да се „заштити регионот од обиди за дестабилизација“.
Тој истакна дека процесот на проширување на Унијата треба „да стане поопиплив за граѓаните“ и дека е важно „да важат истите правила за сите кандидати“, меѓу другото, сите кандидати да бидат примени во роаминг зоната на ЕУ.
Штокер кажа дека граѓаните на Србија можат да сметаат на поддршката на Австрија на патот на реформите кон пристапување кон Унијата и рече дека го поддржува отворањето нови кластери во процесот на преговори. Особено, тој охрабри „секој напор што ќе ги врати сите актери во преговорите меѓу Белград и Приштина на маса“.
„Искрено сме ангажирани во намалувањето на тензиите, но знак на сила и интегритет е она што не е секогаш едноставно, а тоа е помирувањето“, кажа Штокер за дијалогот за нормализација на односите меѓу Србија и Косово.
Во врска со преговорите за пристапување во Европската Унија, Вучиќ кажа дека не знае дали ќе се отвори кластерот 3 – кој вклучува осум поглавја – и дека секогаш ќе има некој во ЕУ, како што е Хрватска, кој ќе каже дека нема да го поддржи отворањето на некој кластер.
Вучиќ, исто така, оцени дека „многумина во ЕУ се надеваа на промена на владата во Србија“, а го обвини и невладиниот сектор дека е „платен однадвор“ и дека има „речиси единствена позиција против владата во Белград, против државата Србија во секоја смисла“.
Во контекст на изборите што ги бара студентското движење и бројни групи граѓани, тој кажа дека изборите ќе се одржат „пред уставниот и законскиот рок“, без да прецизира кога.
Тој потсети дека неговиот втор претседателски мандат истекува на почетокот на 2027 година и дека не може повторно да се кандидира. Сепак, нагласи дека „никогаш не му паѓа на памет“ да го менува уставот за да си овозможи нова кандидатура. Вучиќ ја отфрли и можноста Србија да стане членка на НАТО.
Во врска со изјавата на црногорскиот премиер Милојко Спајиќ дека е во интерес на неговата земја Србија да се приклучи на ЕУ и НАТО, тој кажа дека Србија има добри односи со Северноатлантската алијанса, особено во врска со меѓународната мисија во Косово (Кфор), но дека не сака да биде дел од ниедна поширока воена организација.
