„За тоа се прашува унгарската страна, се прашуваат унгарскиот и српскиот парламент. Нашите односи се повеќе од добри и премиерот Виктор Орбан и јас изразивме желби да продолжиме со забрзувањето и понатамошното приближување на нашите ставови во одбранбената сфера“, кажа Вучиќ по потпишувањето.
Повеќе детали за идејата за српско-унгарска одбранбена алијанса Вучиќ не изнесе. Унгарската и српската страна не зборуваа за тоа, а по потпишувањето на договорот не беа овозможени прашања на новинарите.
Белград кон средината на март остро реагираше на декларацијата која во тоа време во Тирана ја потпишаа Албанија, Хрватска и Косово, која учесниците ја опишаа како документ со кој се зајакнува соработката во договорите за безбедносните предизвици кои би можеле да ја загрозат регионалната безбедност. Од друга страна, Србија ја окарактеризира како провокација и закана за стабилноста.
Криштоф Салаи Боровницки и Братислав Гашиќ, министрите за одбрана на Унгарија и Србија, во Белград денес потпишаа документ со кој се конкретизира договорот за стратегиска соработка на Унгарија и Србија во областа на одбраната од 2023.
Соопштено е дека во 2025 Будимпешта и Белград договориле 79 одбранбени активности во кои спаѓаат заеднички обуки, хеликоптерски и други вежби, соработка во секторите на наменските индустрии, сајбер безбедноста, мировните операции, военото образование и медицината.
„Унгарија секогаш е на страната на чувањето на мирот и Србија секогаш ѝ е сојузник во тоа“, кажа унгарскиот министер за одбрана Салаи Боровницки.
Вучиќ во оваа прилика кажа дека Белград, откако од Будимпешта минатата година купи оклопни транспортери БТР-80А, е заинтересиран за набавка на други системи останати во Унгарија од советскиот период, како и за нови борбени возила линкс КФ-51 кои Унгарија ги произведува во соработка со германски Рајнметал.
Тој додаде дека Унгарија од Србија купува муниција со калибар 7,62 и дека е заинтересирана за борбени возила 8х8 од српско производство.
„Нè очекува многу заедничка работа во воената област. Сè што правиме значи поголема безбедност за граѓаните на двете земји“, кажа Вучиќ.
Тој наведе дека наскоро очекува состанок со унгарскиот премиер Виктор Орбан.
Соопштено е дека трговската размена на Унгарија и Србија надминала три милијарди евра и дека таа земја е петти економски партнер на Србија.
Србија од декември 2006 година е членка на програмата на НАТО Партнерство за мир. На крајот на 2007 година прогласи воена неутралност со собраниска резолуција за заштита на суверенитетот, територијалниот интегритет и уставниот поредок.
Во последните десет години одржа десетици воени вежби со држави од НАТО пактот, вклучувајќи ги Соединетите Американски Држави, но и со Руската Федерација и Белорусија.
Од почетокот на конфликтот во Украина Србија не учествува во воени вежби ни со Истокот ни со Западот.
Исклучок направи во 2023 кога на својата територија 15 дена вежбаше со САД и други земји од НАТО во маневрите наречени „Платинест волк“ одржани во воената база Југ.
