Повеќето научници веруваат дека намалувањето на производството на електрична енергија од јаглен, кое емитува приближно двојно повеќе јаглерод диоксид од производството на електрична енергија од гас, е клучно за постигнување на глобалните климатски цели.
Обновливите извори на енергија како што се ветерот и сончевата енергија испорачале 5.072 тераватчасови (ТВч) електрична енергија низ целиот свет помеѓу јануари и јуни, надминувајќи 4.896 ТВч од јаглен, објави Ембер.
„Ги гледаме првите знаци на клучната промена“, вели Малгожата Вјатрос-Мотика, виша аналитичарка за електрична енергија во аналитичката група Ембер. „Сончевата и ветерната енергија сега растат доволно брзо за да ја задоволат растечката побарувачка за електрична енергија во светот“.
Глобалната побарувачка за електрична енергија се зголемила за 2,6 проценти, или 369 ТВч, во првата половина од 2025 година во споредба со истиот период во 2024 година, што било задоволено со производство на 306 ТВч од сончева енергија и 97 ТВч од ветерна енергија.
Транзицијата кон обновливи извори на енергија е главно поттикната од Кина и Индија. Кина, најголемиот потрошувач на електрична енергија во светот, го намали своето производство од фосилни горива за два отсто, додека производството на сончева енергија и ветерна енергија се зголемило за 43 отсто, односно за 16 отсто, според извештајот на Ембер.
Во Индија е забележан пораст на производството на ветерна и сончева енергија за 29 отсто, односно за 31 отсто, што ѝ помогнало на земјата да ја намали потрошувачката на јаглен и гас за 3,1 отсто, покажува извештајот.
Сепак, производството на фосилни горива се зголемило во Соединетите Американски Држави и Европската Унија во истиот период, бидејќи посилниот раст на побарувачката и послабото производство на ветерна и хидроенергетска енергија наметнале поголема зависност од јаглен и гас.
Во САД, производството на јаглен се зголемило за 17 отсто, додека производството на гас се намалило за 3,9 отсто. Во Европа производството на електрична енергија од гас се зголемило за 14 отсто, а од јаглен за 1,1 отсто, според извештајот.
Претседателот на САД Доналд Трамп, скептик во однос на климатските промени, потпиша извршни наредби насочени кон зголемување на производството на јаглен претходно оваа година, а минатиот месец вети поддршка за електроцентралите на јаглен.
