Блокадата на Ормускиот теснец и повторените напади врз најголемиот светски извозен комплекс за течен природен гас (ТПГ) во Катар доведоа до губење на околу 28 милиони тони снабдување оваа година – што претставува речиси целиот проектиран глобален раст на снабдувањето со ТПГ за 2026 година. Враќањето на нивоата од пред војната може да потрае со години.
“Станува збор за значително затегнување на пазарот – зборуваме за намалена продукција до крајот на деценијата”, изјави директорот за енергетика во групацијата Евроазија, Хенинг Глојстин.
Азија, која купува околу 90 отсто од ТПГ произведен на Блискиот исток, до сега беше заштитена со залихи кои веќе беа на море пред затворањето на теснецот. Сепак, последните бродови ќе пристигнат во наредните неколку дена, по што ќе настане сериозна празнина помеѓу понудата и побарувачката. Таа празнина нема значително да се намали пред 2028 година, кога се очекува нов бран на американско производство на гас.
Најголемите економии во Азија – Кина, Јапонија, Индија и Јужна Кореја – како и земјите во развој како Виетнам и Тајланд, значително се потпираат на течен природен гас (ТПГ) за производство на електрична енергија. Ова неочекувано нарушување го загрозува индустриското производство и би можело да ја доведе во прашање идната подготвеност на регионот да се потпира на овој извор на енергија.
Првите знаци на притисок се веќе видливи. Земјите што можат да го сторат тоа се префрлаат на производство на електрична енергија од нафта и јаглен, а во некои случаи агресивно ја намалуваат потрошувачката. Овие мерки веројатно ќе се интензивираат како што продолжуваат воените прекини на енергетските текови, предупредуваат енергетските експерти.
