Пребарувањето беше започнато откако државниот обвинител повторно ја отвори истрагата минатиот месец, поттикнато од нови информации во документите објавени од Министерството за правда на САД, објавува Ројтерс.
Државниот обвинител на Ново Мексико Раул Торез минатиот месец одлучи повторно да ја отвори истрагата за наводна криминална активност на ранчот, кој се наоѓа на околу 48 километри јужно од главниот град Санта Фе.
Одлуката дојде откако во јануари беа објавени нови судски документи, вклучувајќи го и тврдењето дека Епстин наредил телата на две странски девојки да бидат закопани во планинска област во близина на имотот.
„Министерството за правда на Ново Мексико ќе продолжи да дава навремени информации за јавноста, да им дава поддршка на жртвите и да ги следи фактите каде и да водат“, се вели во официјалното соопштение.
Сведок на Ројтерс во близина на ранчот во понеделник слушнал лаење на кучиња и видел полициско возило со налепница од кучешка шепа како го напушта имотот, што сугерира дека кучиња трагачи биле вклучени во пребарувањето. На локацијата биле видени и државни полициски и локални противпожарни и спасувачки возила.
Претходна истрага за Епстин во Ново Мексико беше прекината во 2019 година на барање на федералните власти, а целосна истрага за наводните напади од страна на Епстин, неговата соработничка Гислен Максвел и посетителите на ранчот никогаш не е спроведена.
Минатиот месец, Ново Мексико стана првата американска држава што формираше законодавна „комисија за вистината“ задолжена за истражување на можна корупција во јавните служби што му овозможила на Епстин да работи во тајност на ранчот 26 години, сè до неговата смрт во 2019 година.
Имотот беше продаден во 2023 година на тексашкиот бизнисмен Дон Хафинс, кој го преименуваше во ранч Сан Рафаел. Министерството објави дека новите сопственици соработуваат во истрагата и овозможиле пристап до имотот за пребарување.
