Вучиќ исто така ја потврди посветеноста на земјата на европскиот пат, призна дека корупцијата е голем проблем и зборуваше за својата политичка иднина по завршувањето на мандатот, пишува Н1 Белград.
Вучиќ нагласи дека ја разбира политиката на Европската Унија кон руските енергенти, нагласувајќи дека Србија „мора да се прилагоди на одредени барања во својата енергетска политика“.
„Сè уште имаме големи залихи на руски гас, но сè повеќе го купуваме од Европејците“, рече Вучиќ. Тој додаде дека целта на Србија е да обезбеди 500 милиони кубни метри гас годишно, што е околу една петтина од нејзините потреби, преку заедничка иницијатива на ЕУ на која се приклучи минатата година.
Ројтерс потсетува дека Србија, како кандидат за членство во ЕУ, останува еден од преостанатите европски купувачи на руски природен гас, кој задоволува речиси 80 проценти од нејзините потреби. Затоа, е под притисок од Унијата да пронајде алтернативни патишта со цел да го намали протокот на пари кон Русија за финансирање на војната во Украина.
Вучиќ објасни дека Србија веќе купува гас од Азербејџан преку Бугарија, а изградбата на гасовод кон Македонија, која започнува оваа година, ќе ѝ обезбеди пристап до течен нафтен гас од Грција.
Српскиот претседател нагласи дека останува посветен на идејата за членство на Србија во ЕУ, објаснувајќи дека економската состојба во земјата е подобрена. „Нема сомнение дека додека сум претседател, Србија ќе биде на европскиот пат“, тврди тој.
Британската агенција наведува дека ЕУ бара од Србија да го зајакне владеењето на правото и слободата на медиумите, како и да ја засили борбата против организираниот криминал и корупцијата ако сака да стане членка. Критичарите, сепак, предупредуваат дека неодамнешните измени во судските закони ќе ја намалат независноста на судството и со тоа ќе го отежнат пристапувањето на Србија кон Унијата. Вучиќ одговори велејќи дека властите се подготвени „внимателно да испитаат сет судски закони“ заедно со европските тела.
Ројтерс истакнува дека Вучиќ, како популист, претрпел силен политички удар по уривањето на настрешница на железничката станица во Нови Сад во 2024 година, во која загинаа 16 лица. Српскиот претседател призна дека корупцијата е проблем во земјата и дека самиот е незадоволен од напорите за нејзино искоренување. „Станува збор за корупција во нашите државни институции, вклучително и кај политичарите“, додаде тој.
Вториот и последен претседателски мандат на Вучиќ завршува во 2027 година, а тој најави дека предвремените избори ќе се одржат оваа година. Тој нагласи дека не е сигурен што ќе прави по завршувањето на неговиот мандат, но не ја исклучи можноста да се врати во партиската политика или на премиерската функција. „Би сакал помалку да се занимавам со политика или воопшто да не се занимавам со неа, но грижата за моето наследство можеби ќе бара некаков ангажман. Ќе видиме“, заклучи Вучиќ.
