„Немаме причина да ја креваме борбената готовност“, кажа Вучиќ, додавајќи дека тоа не се прави за претстава.
Кажа и дека против него се води кампања со цел да ѝ се наштети на Србија.
„Зошто тие би биле на страната на успехот на Србија? Како да објаснат дека Србија има подобар клинички центар, дека има повеќе автопати? Денес се приближуваме по бројот на километри на автопатите на Хрватска. Што беа тие радосни дека кога станав премиер, нивниот БДП беше 43 милијарди а нашиот 32, а денес и на едните и на другите е 53 милијарди. Би биле ли вие среќни на нивно место?“, праша Вучиќ.
Кажа дека Хрватска мора да најде виновник за своите неуспеси.
„Кој им е крив? Мора некого да најдат. Јас сум им крив“, кажа српскиот претседател.
Одговарајќи на прашањето „дали Белград седи на две столчиња“, Вучиќ кажа дека Србија има „свое столче“ и дека притисоците се огромни и дека ќе биде тешко да се издржи.
„До доцна имав разговори со претставниците на повеќе земји, денес цел ден“, кажа тој.
„Толку за почитувањето на независноста и правото на другите земји самите да одлучуваат. Колку можеме ќе издржиме, не е лесно“, кажа Вучиќ.
Додаде дека Србија ќе продолжи да го почитува територијалниот интегритет, но нема да се придружува на санкциите воведени на Русија, барем додека тој е претседател.
„Да ја зачуваме земјата, да ја одбраниме, а образот да ни остане неизвалкан“, порача Вучиќ.
