Точниот број на припадници на Националната гарда кои ќе бидат вооружени не е утврден, а војниците ќе носат пиштоли М17 или пушки М4, изјавија двајца неименувани американски функционери, пренесува Ројтерс.
Стотици припадници на Националната гарда патролираат по улиците на главниот град на САД две недели откако Трамп прогласи кризна состојба, тврдејќи дека Вашингтон е преплавен од бран криминал. Министерот за одбрана Пит Хегсет минатата недела им одобри на овие војници да носат оружје по улиците на главниот град.
Локалната единица на Националната гарда во Вашингтон објави во неделата дека нејзиниот персонал ќе употреби сила само „во крајна потреба и само како одговор на непосредна закана од смрт или сериозни телесни повреди“.
Во меѓувреме, Трамп, член на Републиканската партија, објави дека веројатно ќе ја прошири својата програма за борба против криминалот и во Чикаго, во кој, како и во Вашингтон, на власт се демократи. Сепак, во неделата тој наговести за можноста за испраќање на Националната гарда во Балтимор, град во сојузната држава Мериленд, кој исто така е управуван од демократите.
Неименувани американски претставници рекоа дека претставници на Пентагон изготвиле почетни планови за евентуално испраќање војници на Националната гарда во Чикаго. Еден од претставниците рече дека плановите се дел од напорите на војската да ги предвиди наредбите на Трамп, истакнувајќи дека високи претставници на Пентагон сè уште не се известени за каква било директива на претседателот. Пентагон често планира евентуално распоредување на војници пред да добие официјални наредби, забележува Ројтерс.
Трамп нема овластување да ја испрати војската во Чикаго, изјави демократскиот претставник Хаким Џефрис за Си-ен-ен во неделата, карактеризирајќи го какво било распоредување во градот како обид на Трамп да фабрикува кризна ситуација.
„Нема никаква основа, а Доналд Трамп нема овластување, за евентуално испраќање федерални трупи во Чикаго“, рече Џефрис во неделата.
Џефрис се повика на коментарите од гувернерот на Илиноис, каде што се наоѓа Чикаго, кој рече дека нема криза во државата што би го оправдала испраќањето на Националната гарда или кој било друг дел од војската. Во Чикаго, бројот на кривични дела, вклучително и убиства, е намален минатата година, забележува Ројтерс.
Критикувајќи го демократскиот гувернер на Мериленд, Вес Мур, за наводно раширениот криминал во Балтимор, Трамп рече дека е подготвен да ја испрати војската и во тој град.
Во јули, полициската управа на Балтимор објави двоцифрен пад на бројот на случаите на насилство со оружје од минатата година. Оваа година во градот имало 84 убиства, што е најмал број за повеќе од 50 години, според градоначалникот.
„Ако на Вес Мур му треба помош… Ќе му испратам „војници“, како што направив во Вашингтон, и брзо ќе го искорениме криминалот“, напиша Трамп на платформата Трут соушл во неделата.
Некои републикански гувернери испратија стотици припадници на Националната гарда во Вашингтон, по наредба на Трамп. Според претседателот, главниот град на САД е преплавен со бран криминал, додека официјалните податоци покажуваат дека бројот на кривични дела во градот е намален.
Во неделата, Трамп тврдеше дека сега нема криминал во Вашингтон, припишувајќи го тоа на неговата одлука да испрати војници и стотици припадници на федералната полиција во тој град. Претседателот не ги поткрепи своите изјави со никакви докази, забележува Ројтерс.
Глава 10 од американскиот Кодекс, федералниот закон што ја регулира улогата на американската војска, исто така содржи одредба што му дозволува на претседателот да испраќа единици на Националната гарда за одбрана од инвазија, да потисне бунт или да му овозможи на претседателот да го спроведе закон.
Токму на оваа одредба се повика Трамп кога испрати единици на Националната гарда во Калифорнија претходно оваа година за да ги потисне протестите, и покрај противењето на гувернерот Гевин Њусом, забележува Ројтерс.
