Односите меѓу Зеленски и Трамп се турбулентни веќе некое време. Трамп го нарече украинскиот лидер „диктатор“ и јавно го прекори во Белата куќа во февруари, но Зеленски, свесен за потребата од американска поддршка, доследно избира помирувачки тон. „Ние не сме непријатели со Америка“, изјави Зеленски за британскиот весник Гардијан. „Ние сме пријатели. Па зошто да се плашиме?“
Откако се врати во Овалната соба на почетокот на годината, пристапот на Трамп кон надворешната политика е непредвидлив, што се одрази и во односот кон Украина. Понекогаш го фали Зеленски како „храбар“, додека друг пат сугерираше дека Украина ја започнала војната со Русија, а која ја започна целосната инвазија во 2022 година и го анектираше Кримскиот полуостров во 2014 година.
Сепак, Зеленски го призна влијанието на Трамп на светската сцена. „Сите во светот се плашат од републиканецот“, изјави тој. „Тоа е вистина“.
Минатиот месец, Зеленски го посети Вашингтон со надеж дека ќе обезбеди американски крстосувачки ракети со долг дострел „томахавк“, што ќе му овозможи на Киев да нападне длабоко на руска територија. Иако администрацијата претходно сигнализираше подготвеност да го испорача ова оружје, Зеленски се врати со празни раце. Москва предупреди дека таков потег дополнително ќе го ескалира конфликтот.
Претседателот на Украина ги негираше медиумските извештаи дека средбата со Трамп била расправија полна со вулгарности, опишувајќи ги разговорите како „нормални“ и „конструктивни“.
Покрај ракетите „томахавк“, Зеленски ја нагласи и итната потреба од 27 противвоздушни системи „патриот“. Русија постојано ја напаѓа Украина со воздушни напади, користејќи балистички ракети кои тешко се пресретнуваат. Системот „патриот“ се смета за златен стандард за ракетна одбрана, но овие батерии – како и нивните пресретнувачи – се ретки и се многу барани низ целиот свет.
И покрај сите предизвици, Зеленски ја нагласи важноста на долгорочниот сојуз. „Соединетите Американски Држави се наш стратешки партнер со години, можеби дури и децении и векови“, заклучи украинскиот претседател.
