Покрај церемонијалниот дел од комеморацијата, ќе се одржат изложби, претстави и специјални емисии со сведоштва од преживеани, објавија локалните медиуми.
Францускиот претседател Емануел Макрон ќе ја предводи церемонијата на комеморацијата во Париз, посетувајќи ги сите места на нападите.
На секое место, каде што на Макрон и градоначалничката на Париз, Ан Идалго, ќе им се придружат членови на семејствата на жртвите и преживеаните од нападот, ќе се одржи минута молчење, ќе се положи цвеќе и ќе се прочитаат имињата на жртвите.
На парискиот Плоштад на Републиката, граѓаните ќе можат да положат цвеќе и да палат свеќи. Ќе бидат поставени големи екрани на кои ќе се прикажува текот на комеморацијата за жртвите во текот на денот.
Вечерта, во Градското собрание на Париз (Хотел де Вил) ќе се одржи церемонија за оддавање почит на жртвите, на која ќе бидат прикажани снимки и сведоштва од преживеани како и од полицајци, пожарникари и персонал од службите за итни случаи, како и од Парижани кои живеат во блиските згради каде што се случија нападите.
Церемонијата ќе вклучува говори од политичари, уметници и членови на граѓанското општество. Ќе се емитува во живо на Франс 2, францускиот јавен телевизиски канал. Планирани се две изложби, на кои ќе бидат претставени фотографии, предмети собрани од граѓаните за време и по нападите и други уметнички дела создадени како одговор на нападите.
На 13 ноември 2015 година, тројца бомбаши самоубијци се разнесоа истовремено во Париз – првиот во близина на фудбалски стадион за време на натпревар, вториот пред концертната сала Батаклан за време на концерт и третиот пред неколку ресторани.
Батаклан претрпе најмногу жртви, 90, додека групата Исламска држава ја презеде одговорноста за сите напади.
Француски суд осуди 20 лица во јуни 2022 година за терористичките напади, кои се случија неколку месеци пред нападот на 7 јануари врз канцелариите на францускиот сатиричен неделник Шарли Ебдо, кој останува гласен бранител на слободата на изразување. Дванаесет лица беа убиени во нападот, вклучувајќи ги и познатите карикатуристи и новинари на весникот.
