Текстот беше одобрен со 20 од 31 глас, објави весникот Ел Обсервадор, кој забележува дека Уругвај е првата земја во претежно католичкиот регион чиј парламент ја легализирал евтаназијата, додека во Колумбија и Еквадор оваа практика е декриминализирана преку судовите.
„Денес, Уругвај повторно е во прв план поради човековите права. Го донесовме законот за евтаназија: мерка што ја признава слободата на избор до самиот крај, со достоинство и слобода“, изјави сенаторката Констанца Мореира на социјалните мрежи.
Сенаторот Алехандро Санчез рече дека усвојувањето на законот „зборува за длабока посветеност на човечкото достоинство и слобода“.
Сенаторот Даниел Каџани зборуваше за „историски ден“. „Уругвај, кој повторно води во проширувањето на правата, е првата земја во Латинска Америка со закон што дозволува евтаназија, гарантирајќи го правото на достоинствена смрт“, продолжи тој.
Уругвај се придружува на само неколкуте земји во светот што имаат закони за евтаназија, вклучувајќи ги Холандија, Шпанија и Канада.
