Според претседателот на Соединетите Американски Држави, саботажата се случила за време на неговото пристигнување и говор на Генералното собрание на Обединетите нации во Њујорк оваа недела.
Тој преку социјалната мрежа Трут соушл изјави дека првата саботажа се случила кога влегол во зградата на Обединетите нации, кога, токму во тој момент, ескалаторот престанал да работи, принудувајќи го него и неговата придружба да пешачат до главната сала.
Втората „саботажа“ била дефект на уредот што го прикажува текстот на говорот на стакло пред говорникот, принудувајќи го да гледа во листови хартија за време на говорот. Тој додаде и дека озвучувањето за време на неговиот говор било исклучително слабо, што му го потврдила и неговата сопруга Меланија, која нагласила дека ништо не го разбрала.
„Сето ова не беше случајност. Тоа беше класична саботажа и Обединетите нации мора да се засрамат од тоа. Барам итна истрага поради сè“, рече Трамп, додека Обединетите нации делумно одговорија на сите овие обвинувања. Тие нагласија дека дефектот со ескалаторот бил случаен, додека за уредот што го прикажува текстот од говорот бил одговорен човек од персоналот на Трамп.
