Зборувајќи со новинарите во Њу Џерси, Трамп рече дека Виткоф во моментов е фокусиран на решавање на кризата во Појасот Газа, но дека ќе патува и во Москва.
„Мислам дека ќе оди во Русија можеби во среда или четврток. Тие сакаат да го видат, побараа да се сретнат со него. Ќе видиме што ќе се случи“, рече Трамп.
Рускиот претседател Владимир Путин веќе се сретна со Виткоф во Москва во неколку наврати пред напорите на Трамп за обновување на врските со Кремљ нагло да бидат прекинати.
Новинарите беа заинтересирани и за тоа што ќе се случи на 8 август, кога Трамп претходно објави дека Русија може да потпише прекин на огнот со Украина. Американскиот претседател одговори дека тогаш ќе бидат воведени нови санкции, но дека Русија често успева да најде начин да ги избегне.
„Знаете, тие се лукави и доста добри во избегнувањето на санкциите“, рече Трамп. На прашањето што може да направи Русија за да избегне санкции, Трамп одговори: „Единствениот начин е да склучат мировен договор и да престанат да убиваат луѓе“.
Трамп исто така рече дека две нуклеарни подморници, кои ги испрати во близина на Русија по онлајн расправијата со поранешниот руски претседател Дмитриј Медведев, сега се „во регионот“.
Трамп не кажа дали мисли на подморници на нуклеарен погон или на подморници со нуклеарно оружје. Тој исто така не разјасни каде точно се испратени подморниците, што е воена тајна.
До ѕвечкање со нуклеарно оружје дојде во контекст на рокот што Трамп го постави за Русија на крајот неделата, до кој Русија мора да преземе чекори кон завршување на војната во Украина или да се соочи со нови санкции.
Трамп претходно се закани дека новите мерки би можеле да значат „секундарни тарифи“ против преостанатите трговски партнери на Русија, како што се Кина и Индија. Ова дополнително би ја пригушило Москва, но би можело негативно да влијае и на глобалните синџири на снабдување.
И покрај притисокот од Вашингтон, руската агресија врз Украина продолжува.
Путин, кој постојано ги отфрла повиците за прекин на огнот, во петокот изјави дека сака мир, но дека неговите барања за прекин на речиси три и полгодишната инвазија „не се променети“.
„Ни треба долгорочен и стабилен мир на цврсти темели што ќе ги задоволи и Русија и Украина и што ќе ја осигури безбедноста на двете земји“, изјави Путин пред новинарите. Но, тој додаде дека „условите (на руската страна) сигурно остануваат исти“.
Русија постојано ја повикува Украина да ја предаде контролата над четирите региони за кои Москва тврди дека ги анектирала, барање што Киев го смета за неприфатливо.
Путин исто така бара од Украина да се откаже од своите аспирации за членство во НАТО алијансата. Украина вчера започна напад со беспилотни летала што предизвика пожар во складиште за нафта во Сочи, градот домаќин на Зимските олимписки игри во 2014 година.
Киев изјави дека ќе ги засили своите воздушни напади врз Русија како одговор на зголемувањето на руските напади на својата територија во последните недели, во кои беа убиени десетици цивили.
Украинскиот претседател Володимир Зеленски исто така рече дека двете земји подготвуваат размена на затвореници во рамки на која 1.200 украински војници ќе се вратат дома по преговорите со Русија во Истанбул во јули.
Трамп го започна својот втор мандат со оптимистично предвидувања дека војната во Украина, која трае откако Русија ја започна својата инвазија во февруари 2022 година, наскоро ќе заврши. Трамп во последните недели сè повеќе го изразува своето незадоволство од Путин поради немилосрдната агресија на Москва.
