Бирото за затвори на САД објави во петокот дека Максвел е префрлена од затвор во Флорида во затвор со минимална безбедност во Тексас за да продолжи да ја отслужува 20-годишната казна за помагање на покојниот финансиер и сексуален престапник Џефри Епстин во сексуално злоставување на малолетни девојчиња.
Трансферот на Максвел се случи една недела откако таа се сретна со заменик-јавниот обвинител на САД Тод Бланш, кој рече дека сака да разговара со неа за некој друг што можеби бил вмешан во злосторствата на Епстин.
Средбата на Бланш со Максвел доаѓа во време кога Трамп се соочува со притисок и од своите конзервативни поддржувачи и конгресните демократи да објави повеќе информации од истрагите на Министерството за правда за Максвел и Епстин.
Адвокатот на Максвел, Дејвид Маркус, потврди дека таа е префрлена, но рече дека нема понатамошен коментар.
Портпаролите на Министерството за правда на САД не одговорија на барањата за коментар.
Запрашан за време на интервјуто за Њузмакс во петокот за можноста за помилување на Максвел, претседателот Доналд Трамп рече: „Јас го имам тоа овластување, но никој не побарал од мене тоа да го направам“.
Тој додаде: „Не знам ништо за случајот“.
На прашањето што разговарале Максвел и заменик-генералниот обвинител минатата недела, Трамп рече дека верува оти Бланш „само сака да се осигури дека невини луѓе нема да бидат повредени“ ако бидат објавени документи од истрагата за Епстин.
На прашањето зошто Максвел е преместена, портпаролот на федералната затворска агенција Доналд Мерфи рече дека не може да коментира за спецификите на сместувањето на одреден затвореник, но дека агенцијата одредува каде се испраќаат затворениците врз основа на фактори како што се „нивото на безбедност и надзор што му е потребен на затвореникот“.
Министерството бара одобрение од судот за објавување на транскрипти од сведочењата на судски службеници пред Големата порота кои поднесоа обвиненија против Максвел и Епстин.
Ваквите транскрипти обично се чуваат во тајност.
Двајца федерални судии во Менхетен ги разгледуваат барањата на владата.
Адвокатите на Максвел, Епстин и нивните наводни жртви треба да ги презентираат своите ставови за потенцијалното објавување на тие документи пред судиите во вторник.
Епстин изврши самоубиство во затворска ќелија на Менхетен во 2019 година, додека чекаше судење по обвинението за трговија со луѓе за сексуална експлоатација.
Тој се изјасни за невин.
Ни Маркус ниту Бланш не дадоа детални извештаи за тоа што се дискутирало.
Маркус рече дека Максвел би го поздравила помилувањето на Трамп.
Максвел беше прогласена за виновна на судењето во 2021 година за регрутирање девојки што ги злоупотребувал Епстин.
Таа се изјасни за невинa и бара од Врховниот суд да ја поништи нејзината пресуда.
