„Во моментов имаме бродови што пловат кон Иран, големите, најголемите и најдобрите. Разговараме со Иран и ќе видиме како ќе се заврши“, им рече Трамп на новинарите во Белата куќа. Тој додаде дека договор би бил „одличен“, но дека во спротивно ќе има последици. „Ако не успееме, веројатно ќе се случат лоши работи“, рече тој, пренесува Анадолу.
Дипломатската активност се интензивираше во последните денови. Порталот „Аксиос“ објави дека се очекува специјалниот претставник на Трамп, Стив Виткоф, и иранскиот министер за надворешни работи, Абас Арагчи, да се сретнат во Истанбул во петок.
Се очекува средбата да биде дел од обновените напори за решавање на прашањето за нуклеарната програма на Иран. Извори запознаени со подготовките потврдија дека тие се во тек, но еден од нив забележува дека плановите сè уште не се конечни и се предмет на промена.
Турција, Египет и Катар одиграа клучна улога во посредувањето и олеснувањето на контактите меѓу Вашингтон и Техеран во последните денови. Арагчи веќе беше во Истанбул минатиот петок, каде што се сретна со турскиот претседател Реџеп Таип Ердоган и министерот за надворешни работи Хакан Фидан.
Иако немаше официјални најави, иранската новинска агенција Тасним објави дека иранскиот претседател Масуд Пезешкијан наредил продолжување на нуклеарните преговори со САД, во кои учествуваат високи функционери од двете земји.
Најновите изјави доаѓаат откако Трамп минатата недела изјави дека огромна „армада“ се движи кон Иран и го повика Техеран на итни преговори. Подоцна тој тврдеше дека Иран „сериозно разговара“ со САД.
Тензиите ескалираа минатиот јуни, кога Израел, поддржан од Вашингтон, започна дванаесетдневен напад врз Иран. Целите вклучуваа воени и нуклеарни локации, како и цивилна инфраструктура, а во нападите беа убиени високи команданти и научници.
Иран одговори со напади со ракети и беспилотни летала врз израелските воени и разузнавачки објекти, што ги натера САД да започнат бран воздушни напади врз иранските нуклеарни објекти.
Американскиот претседател и претходно се закануваше со воена акција, а тензиите дополнително се зголемија по антивладините протести во Иран што започнаа кон крајот на декември поради падот на вредноста на ријалот, зголемената инфлација и влошувањето на условите за живот. Иранските власти предупредија дека секој американски напад би предизвикал „брз и сеопфатен“ одговор.
