Во писмото, американскиот претседател наведува дека одлуката на Косово да прифати граѓани од други земји покажува силна подготвеност за соработка со САД, нагласувајќи дека водството во ова прашање ја одразува силата и сочувството на народот на Косово, како што е објавено на Фејсбук страницата на косовската претседателка.
„Соединетите Американски Држави и Косово делат длабока врска, заснована на меѓусебно почитување, заеднички демократски вредности и визија за мирна и просперитетна иднина. Вашата посветеност на зајакнување на оваа врска не остана незабележана и уверен сум дека заедно ќе продолжиме да ги унапредуваме нашите заеднички цели“, нагласи Трамп.
Заблагодарувајќи ѝ се на претседателката Османа за зајакнувањето на партнерството со САД, Трамп додаде: „Ви благодарам уште еднаш за вашето храбро водство и за тоа што стоите како вистински пријател на Соединетите Американски Држави. Се радувам на соработката со вас во наредните години.“
На крајот од писмото, Трамп ги пренесе поздравите од првата дама на САД, Меланија Трамп, до претседателката Османи.
Пред два месеци, Косово се согласи да прима мигранти депортирани од Соединетите Американски Држави. Одлуката беше донесена како одговор на барањето на САД за привремен прием и преместување на државјани од трети земји.
Во период од една година, Косово ќе прифати и смести до 50 лица со цел да се олесни нивното безбедно враќање во нивната земја на потекло. Изборот на тие лица ќе се направи од предложениот список, под услов да исполнуваат одредени критериуми поврзани со владеењето на правото и јавниот ред.
Во изјава за Си-би-ес њуз, амбасадата на Косово во САД потврди во јуни дека е постигнат договор за депортација.
„Како одговор на барањето на Соединетите Американски Држави за прифаќање и преместување на државјани од трети земји, ја изразивме нашата подготвеност да соработуваме со Соединетите Американски Држави во решавањето на ова прашање под утврдени услови“, се вели во соопштението на амбасадата.
Косово ги смета САД за еден од своите најсилни сојузници на меѓународната сцена. По хаотичното повлекување на САД од Авганистан во 2021 година, Косово се согласи да прими евакуирани авганистански лица на кои им беше потребна дополнителна безбедносна проверка.
Од почетокот на вториот мандат на Доналд Трамп и зголеменото ограничување на нелегалната имиграција, американската влада бара слични договори со земји во Азија, Африка, Латинска Америка и други делови од светот.
