Поранешната државна секретарка на САД вчера ја обвини администрацијата на Трамп за „намерно забавување“ на објавувањето на досиејата поврзани со осудениот сексуален престапник и го повика неговиот тим да ги „објави документите“, јави Скај њуз.
Таа исто така рече дека „секој што е повикан на суд треба да сведочи“ пред Конгресот, инсистирајќи дека сослушувањата мора да бидат јавни и фер. Таа тврдеше и дека таа и нејзиниот сопруг, поранешниот претседател Бил Клинтон, станале политичка цел.
„Сакаат да нè вовлечат во ова за да го одвлечат вниманието од претседателот Трамп. Работата е многу едноставна“, рече таа. Клинтонови треба да се појават пред Комитетот за надзор следната недела, иако првично се спротивставија на поканите за сведочење.
Името на Бил Клинтон се споменува неколку пати во документите на Епстин, а и неколку негови фотографии се прикачени. Хилари Клинтон призна дека се сретнала „неколку пати“ со Гислен Максвел, осудената соработничка на Џефри Епстин. И Бил и Хилари Клинтон негираат дека знаеле за сексуалните престапи на Епстин.
„Немам што да кријам, ослободен сум од вина и немам никаква врска со Џефри Епстин“, рече Трамп денес кога новинарите го прашаа за обвинувањата на Хилари Клинтон. „Тие се вовлечени во ова и тоа е нивен проблем. Ќе видиме што ќе се случи. Таа сериозно страда од синдром на растројство со Трамп“, додаде тој.
Министерството за правда на САД досега објави повеќе од три милиони страници документи поврзани со Епстин. Сепак, начинот на кој беа објавени досиејата беше остро критикуван од демократите, како и од некои републикански политичари.
Минатата недела, републиканскиот претставник Томас Маси ја обвини државната обвинителка Пам Бонди, која го надгледува објавувањето, дека ги крие имињата на моќни соработници на Епстин. Тој го обвини Министерството за правда и за „голем пропуст“ во спроведувањето на законот. Пратениците се пожалија дека редигираните делови од евиденцијата одат подалеку од ограничените исклучоци дозволени со законот што Конгресот го донесе речиси едногласно во ноември.
Министерството одби и да објави значителна количина материјал, повикувајќи се на законски привилегии. Министерството за правда, државната обвинителка Бонди и претседателот Трамп постојано ги негираа тврдењата за неоправдани обиди за задржување или ограничување на објавувањето на информации.
