Кабинетот на поранешниот американски претседател Барак Обама го прекина молкот во однос на повикот на Доналд Трамп за негов кривичен прогон, отфрлајќи ги обвинувањата дека се обидел да изврши „државен удар“ по победата на Трамп во 2016 година со „фабрикување“ докази за руско мешање.
Канцеларијата на Обама презеде необичен чекор и издаде силно соопштение откако Трамп им рече на новинарите дека неговиот претходник се обидел да изврши државен удар против него и дека е виновен за „велепредавство“.
Трамп ги изнесе обвинувањата во Белата куќа за време на состанокот со филипинскиот претседател Фердинанд Маркос помладиот. Кога новинарите го прашаа кој треба да биде главната цел на истрагата, Трамп одговори: „Врз основа на она што го прочитав, тоа би бил претседателот Обама. Тој започна, а Бајден беше со него. Коми и Клапер беа таму, цела група.“
„Водачот на бандата беше претседателот Обама, Барак Хусеин Обама. Дали сте слушнале за него?“ праша Трамп, додавајќи: „Ова е неоспорен доказ дека Обама се обидувал да изврши државен удар. Тој е виновен. Ова беше велепредавство. Тие се обидоа да ги украдат изборите.“
President Trump: “This is irrefutable proof that Obama was trying to lead a coup.”
Arrest Barack Hussein Obama.pic.twitter.com/A2QkYB4fut
— Paul A. Szypula 🇺🇸 (@Bubblebathgirl) July 22, 2025
„Од почит кон канцеларијата на претседателот, нашата канцеларија вообичаено не одговара на постојаните бесмислици и дезинформации што излегуваат од оваа Бела куќа“, се вели во соопштението од кабинетот на Обама. „Но, овие обвинувања се доволно скандалозни што заслужуваат одговор. Овие бизарни обвинувања се смешни и слаб обид за одвлекување на вниманието“, се додава во соопштението.
Во соопштението се критикуваат и обвинувањата изнесени во документ од 11 страници објавен од Тулси Габард, директорката на националната разузнавачка служба, во кој се препорачува кривично гонење на функционери на Обама.
Канцеларијата на Обама нагласи дека ништо во спорниот документ не го поткопува широко прифатениот заклучок дека Русија се обидела да влијае на изборите во 2016 година, но не успеала да манипулира со гласовите. „Овие наоди беа потврдени во извештајот од 2020 година од страна на двопартискиот Сенатски разузнавачки комитет, предводен од тогашниот претседател Марко Рубио“, се вели во соопштението.
Во понеделник, Трамп објави видео генерирано од вештачка интелигенција на својата социјална мрежа Трут соушл, на кое се гледа апсење на поранешниот американски претседател Барак Обама.
Видеото ги прикажува Трамп и Обама како седат и се смеат во Белата куќа, пред агенти на ФБИ да влезат во собата, да го турнат Обама на земја и да му стават лисици. Следната сцена го прикажува Обама како шета во ќелија во портокалова затворска униформа. „Никој не е над законот“, порача Трамп.
BREAKING 🚨 Donald Trump posted an Ai video of Obama getting handcuffed and thrown in prison
I ABSOLUTELY VOTED FOR THIS 🔥 pic.twitter.com/ZflRcjRKOc
— MAGA Voice (@MAGAVoice) July 20, 2025
Соопштението на Трамп дојде откако директорката на Националното разузнавање, Тулси Габард, се закани дека ќе ги гони службениците на администрацијата на Обама, обвинувајќи ги за планирање „предавнички заговор“ за да ја прикажат победата на Трамп на претседателските избори во 2016 година како резултат на руско мешање.
Таа предупреди дека Обама и високите службеници во неговата администрација „поставиле основа за повеќегодишен државен удар“ против Трамп по неговата победа над Хилари Клинтон.
Фокс њуз неодамна објави дека поранешниот директор на ЦИА Џон Бренан и поранешниот директор на ФБИ Џејмс Коми се под истрага за наводни неправилности поврзани со минатите владини истраги за наводите за руско мешање во изборите во САД.
Разузнавачките агенции во 2017 година проценија дека „целите на Русија биле да ја поткопаат довербата на јавноста во американскиот демократски процес, да ја дискредитираат Хилари Клинтон и да ѝ наштетат на нејзината изборност и потенцијалното претседателствување“.
