Генералниот директор на Светската здравствена организација (СЗО) Тедрос Аданом Гебрејесус го повтори својот повик да ѝ се даде приоритет на вакцинацијата на околу 70 отсто од светската популација. Тој додаде дека само така годинава ќе заврши „акутната фаза“ на пандемијата на ковид-19.
Говорејќи денеска на прес-конференција во Јужна Африка, шефот на СЗО рече дека очекувањата се дека најлошото од пандемијата ќе заврши до „средината на оваа година околу јуни, јули“ доколку се постигне целта за вакцинација.
Преминувањето на тој праг за вакцинација „не е прашање на случајност“, туку „прашање на избор“, рече Тедрос, додавајќи дека одлуката да се мобилизираат ресурси за да се исполни таа цел е „во наши раце“.
Тој истакна дека „повеќе од 10 милијарди дози биле администрирани на глобално ниво“ во текот на изминатите две години, но рече дека „научниот триумф“ на развојот и распределувањето на вакцините против ковид-19 бил „оцрнет од огромните нееднаквости во пристапот“.
Додека „повеќе од половина од светската популација сега е целосно вакцинирана“, рече тој, „84% од населението во Африка допрва треба да добие прва доза“. Концентрацијата на производството на вакцини во „неколку земји претежно со високи приходи“ е виновна за „голем дел од оваа нееднаквост“, истакна тој.
Наводно се вакцинирани само 11% од Африканците, што го прави најневакцинираниот континент во светот. Минатата недела, канцеларијата на СЗО за Африка рече дека регионот треба да ја зголеми стапката на вакцинација за „шест пати“ за да ја исполни целта на СЗО од 70%.
За таа цел, Тедрос ја истакна „итната потреба да се зголеми локалното производство на вакцини“ во „земјите со низок и среден приход“. Тој укажа на неодамнешниот развој на првата локално произведена иРНК-вакцина против ковид на континентот – направена со помош на секвенца од вакцината на Модерна – како надежен чекор.
„Очекуваме оваа вакцина да биде посоодветна за контекстите во кои ќе се користи, со помалку ограничувања за складирањето и со пониска цена“, рече Гебрејесус, додавајќи дека вакцината ќе биде подготвена да ги почне клиничките испитувања подоцна во текот на годината, а дека одобрувањето се очекува во 2024 година.
