Околу 1.500 луѓе досега се евакуирани од своите домови поради свлечиштето, кое прво покажа знаци на движење во неделата, а потоа се прошири по должината од околу четири километри. Пукнатината сè уште се шири, што предизвикува стравувања дека би можела да го проголта историскиот центар на градот, пишува Гардијан.
„Ова е драматично“, рече Масимилијано Конти, градоначалник на Нишеми, град на југот од островот, во видео порака на социјалните мрежи, повикувајќи ги жителите надвор од ограничените зони да „останат во своите домови“.
„Не сакам никој да го сфати ова лежерно. За среќа, нема повредени, забележана е само материјална штета на куќите“, рече тој. Фотографиите и видеата покажуваат куќи на сам раб на уривање.
Салваторе Кочина, генералниот директор на сицилијанската цивилна заштита, синоќа изјави: „Сите куќи во радиус од 50 до 70 метри ќе се урнат“.
Училиштата денес останаа затворени, како и патот што ги поврзува Нишеми со крајбрежниот град Гела. Нишеми има население од околу 25.000 жители. Многу од евакуираните престојувале кај роднини, додека стотици ги поминале последните две ноќи во локалната спортска сала.
Во интервју за „Ла Република“, објавено денес, Конти рече: „Не можеме да негираме, исплашени сме“.
Тој додаде дека свлечиштето се поместило уште десет метри утрово. „Од фотографиите од воздух беше шокантно да се види како се урива нашето Нишеми. Ситуацијата е исклучително сериозна, особено затоа што земјата сè уште пука, а дождот ги отежнува интервенциите и техничките испитувања“, нагласи тој.
#Niscemi La frana avanza ancora, le immagini dal drone aggiornate a martedì mattina pic.twitter.com/GlAIUcGl2l
— Local Team (@localteamit) January 27, 2026
Тој како посебен проблем ја истакна можноста градот да биде отсечен. „Постојано ја следиме ситуацијата бидејќи сè може да се промени во секој момент“, рече тој.
Италијанската влада вчера прогласи вонредна состојба за јужните региони погодени од циклонот Хари минатата недела. Силната бура донесе обилни дождови и бранови високи до девет метри, предизвикувајќи големи штети во Сицилија, Калабрија и Сардинија, каде што се уништени патишта, а бројни туристички одморалишта беа однесени од морето. Се проценува дека вкупната штета надминува милијарда евра.
Владата обезбеди почетни 100 милиони евра за итни потреби на најтешко погодените подрачја. Министерот за цивилна заштита Нело Мусумечи изјави дека владата ќе усвои нова меѓуресорска мерка во наредните денови за да се олесни обновата и реконструкцијата на оштетената инфраструктура.
Само на Сицилија, штетата се проценува на околу 740 милиони евра, иако властите предупредуваат дека конечната сума може да биде и двојно поголема.
