Од вторник до петок, камера со вештачка интелигенција инсталирана на авенијата Сингро наводно регистрирала над 1.000 прекршоци, вклучувајќи употреба на мобилен телефон и неврзување на безбедносни појаси, објави Катимерини.
Во истиот период, околу 800 случаи на пречекорување на бризната се регистрирани на дел од патот каде што ограничувањето на брзината е 90 километри на час.
Исто така, регистрирани се 480 случаи на поминување на црвено светло.
Пилот-програмата, започната минатата недела на осум локации со висок ризик по препорака на грчката полиција, е дел од поширока кампања за подобрување на безбедноста на патиштата.
„Ова е политичка одлука со јасна социјална цел. А тоа е намалување на бројот на сообраќајни несреќи и спасување животи“, рече министерот за дигитално управување Димитрис Папастергиу.
Според него, целта на оваа акција е одвраќање, а не казнување.
„Сакаме граѓаните да знаат дека правилата важат за сите и се спроведуваат на фер и современ начин“, рече тој.
Возачите ќе бидат известени за прекршоците преку дигитално поштенско сандаче на владината платформа гов.гр или преку електронски пораки, а ќе можат да поднесуваат жалби преку интернет.
Како што е најавено, властите планираат да ја прошират мрежата на 2.500 камери низ целата земја, вклучувајќи 2.000 фиксни единици на локации со висок ризик и 500 камери инсталирани во автобусите на јавниот превоз за следење на автобуските ленти.
