Републиканскиот американски сенатор и сојузник на претседателот Доналд Трамп, Линдзи Греам, изјави дека Вашингтон треба драстично да го зголеми притисокот врз Москва, па дури и да ја снабди Украина со крстосувачки ракети „томахавк“, доколку рускиот претседател Владимир Путин одбие да го прифати договореното мировно решение.
Греам верува дека досегашните дипломатски напори само ѝ купуваат време на Москва за остварување на понатамошни воени цели.
Во емисија на Ен-би-си, Греам изложи детален план. „Ако (Путин) овој пат каже не, еве што се надевам дека ќе направи претседателот (Доналд) Трамп: Ќе го потпише мојот закон, кој има 85 ко-спонзори, и ќе воведе царини за земји како Кина кои купуваат евтина руска нафта. Ќе ја прогласи Русија за држава спонзор на тероризмот за киднапирање на 20.000 украински деца. И најважно, ќе ги заплени бродовите што носат санкционирана руска нафта, како што прави во Венецуела“, рече Греам.
„Ако Путин каже не, треба драматично да ја промениме играта, вклучително и давање на Украина ракети „томахавк“ за да ги погоди фабриките за беспилотни летала и ракети што постојат во Русија. Би одел до крај ако Путин каже не“, додаде тој, тврдејќи дека Путин „ќе продолжи да го зазема Донбас со сила сè додека не го зголемиме притисокот“.
Коментарите на Греам дојдоа откако украинските и американските претставници ја завршија новата рунда мировни преговори во Флорида во саботата. Средбата е дел од напорите на Вашингтон за финализирање на мировна рамка и следи по украинско-американските разговори на 19 декември и американско-руските разговори на 20 декември во Мајами, и уште едни американско-руски разговори на 21 декември.
Секретарот на Советот за национална безбедност и одбрана на Украина, Рустем Умеров, кој ја предводеше киевската делегација, ги оцени разговорите како конструктивни. „Во текот на изминатите три дена во Флорида, украинската делегација одржа серија продуктивни и конструктивни состаноци со американски и европски партнери. … Украина останува целосно посветена на постигнување праведен и одржлив мир“, напиша тој. Разговорите се фокусираа на ревидиран мировен план од 20 точки, можни безбедносни гаранции за Украина и долгорочни мерки за економски развој.
„Нашиот пристап е дека сè мора да биде изводливо – секоја клучна мерка за мир, безбедност и реконструкција“, рече претседателот Володимир Зеленски во посебна изјава по разговорот со Умеров.
Предлозите на Греам би можеле да ја оживеат дебатата што започна претходно оваа есен. На 2 ноември, американскиот претседател Доналд Трамп изјави дека нема планови да ѝ обезбеди на Украина ракети „томахавк“ со долг дострел. „Не, всушност не… работите би можеле да се променат, но не планирам во овој момент“, им рече тој на новинарите.
Од друга страна, Пентагон сигнализираше дека има доволно залихи ако се донесе политичка одлука за трансфер на оружјето. Ракетите „томахавк“, способни да погодат цели на оддалеченост од 1.000 до 1.500 километри, би ѝ овозможиле на Украина да погоди воени цели длабоко на руска територија – потег за кој Путин предупреди дека ќе означи „нова фаза на ескалација“.
