Фелипе е првиот шпански монарх во 18 години што ја посети Кина, додека Мадрид се стреми да ги зголеми кинеските инвестиции и да го прошири своето дипломатско влијание во Азиско-пацифичкиот регион.
Кина, од своја страна, се стреми да ги надмине трговските тензии со блокот на ЕУ поради својата силно субвенционирана индустрија на електрични возила, додека царините на американскиот претседател Трамп го оптоваруваат извозот.
Кина минатата недела предложи продолжување на инвестициските разговори што се замрзнати од 2021 година.
„На светот му се потребни поконструктивни сили посветени на мирот и развојот“, му рече Си на Фелипе за време на состанокот во Пекинг, наведувајќи ги промените и нестабилноста во меѓународната ситуација.
Тој додаде дека Кина е подготвена да работи „рака под рака“ со Шпанија на изградба на сеопфатно стратешко партнерство, велејќи дека таков однос би бил стратешки постабилен, подинамичен и глобално влијателен.
Државната телевизија ЦЦТВ објави дека Си и Фелипе присуствувале на церемонија на потпишување на документи, но детали не беа објавени.
Мадрид ја засили економската соработка со Пекинг откако Европската унија одлучи да воведе царини за електрични возила произведени во Кина.
Премиерот Педро Санчез двапати ја посети Кина за да ја промовира Шпанија како инвестициска дестинација, особено во автомобилската индустрија, зелената технологија и други индустрии во развој.
Но, како најголем европски извозник на свински производи, Шпанија се најде во центарот на тензиите меѓу Кина и Европската комисија, која управува со трговската политика на блокот, при што свинските производи сега се предмет на контрамерки и царини до 62,4 проценти.
Како главен снабдувач на свинско месо во Кина, Шпанија ѝ продава месо и нуспроизводи во вредност од околу 1,2 милијарди долари секоја година, што претставува околу една петтина од увозот.
Кралот Фелипе му нуди на Мадрид друг пат – оној на суптилната дипломатија што може да го изведе, пренесувајќи пораки што не мора нужно да бидат поврзани со избрана влада кога односите се напнати или политички чувствителни.
„Пријателството меѓу Шпанија и Кина несомнено им користи на двата народа и им одговара на две земји со богата историја и меѓународно влијание“, му рече Фелипе на својот домаќин, додавајќи дека е изграден однос на доверба.
Во април, Соединетите Американски Држави за одлуката на Шпанија да воспостави поблиски трговски врски со Кина рекоа дека е како да си го „пресечат сопственото грло“, додека Европската Унија како целина продолжува да изразува загриженост за трговските нерамнотежи и односите на Кина со Русија.
