Гасоводот е завршен, а го градеше истоимениот конзорциум кој е регистриран во Швајцарија. Предводен е од руски Газпром, а го сочинуваат и германските Унипер и Винтершал Деа, австриската ОМВ, француската Енџи и британската Шел. Секоја компанија инвестирала 950 милиони евра во изградбата на гасоводот.
Шел во понеделникот објави дека се повлекува од проектот поради руската агресија врз Украина. Швајцарскиот министер за економија на телевизија објави дека Северен тек 2 отпуштил околу 140 вработени. Телевизиската станица Имите Вестшвајца Фјанзин извести дека компанијата побарала средба со локалните власти, но во Северен тек 2 не ја потврдија оваа информација.
Проектот долго време е предмет на контроверзии, а минатата недела се најде на мета на нови американски санкции, кои на компаниите им забрануваат да работат со конзорциумот со седиште во Швајцарија. Кризата во Украина така ја натера Германија во краток рок да престане да ги користи руските фосилни горива, истакнува агенцијата дпа.
Германија сега ќе вложи „вистински национални напори“ за производство на струја од обновливи извори, изјави во вторникот претставник на Министерството за економија. Државната секретарка во министерството Франциска Брантна за радио станицата Дојчландфунк изјави дека првите нацрт-закони се веќе готови.
„Планираме вистински национални напори да го забрзаме воведувањето на обновливите извори на енергија“, рече Брантна. Германските медиуми досега се повикуваа на документ од министерството во кое се наведува дека електричната енергија во Германија треба „речиси целосно да доаѓа од обновливи извори на енергија“ до 2035 година наместо до 2050 година.
„Не се работи само за заштита на климата, туку и за заштита на безбедноста“, рече Брантна. „Мораме едноставно да дадеме се од себе“, додаде германската функционерка.
