Според севернокорејските државни медиуми, Ким и другите функционери на состанокот на Политбирото „позитивно ја оцениле ситуацијата со пандемијата, која е под контрола и се подобрува низ целата земја“.
Тие разговарале и за прашањето за ефективна и брза координација, како и за „спроведување на антиепидемиски прописи и препораки“, имајќи предвид дека моменталната ситуација е „стабилна“.
Северна Кореја во неделата официјално регистрирала уште 89.500 пациенти со симптоми на треска, со што вкупниот број на такви случаи се искачи на 3,4 милиони. Властите не соопштија дали има уште смртни случаи.
Многу здравствени експерти надвор од Северна Кореја проценуваат дека случаите на треска во Северна Кореја се всушност ковид-19, верувајќи дека властите знаат да разликуваат ковид-19 од треска предизвикана од други заразни болести.
Од почетокот на епидемијата на 12 мај, Северна Кореја го објавува само дневниот број на пациенти со симптоми на треска, но не и заразени со коронавирус, поради недостаток на тестови кои би ја потврдиле инфекцијата.
Експерти надвор од Северна Кореја веруваат дека земјата ја намалува стапката на смртност за да спречи политички последици за Ким. Тие велат дека треба да има многу повеќе смртни случаи во Северна Кореја, бидејќи нејзините 26 милиони жители се главно невакцинирани против ковид-19 и затоа што земјата нема капацитет да лекува критично болни пациенти.
Други се сомневаат дека севернокорејските власти го преувеличиле бројот на случаи со симптоми на треска, со цел да ја зајакнат контролата врз населението.
Поради епидемијата, Северна Кореја воведе карантин низ целата земја, изолација на сите работни и станбени единици и забрана за меѓурегионални патувања.
Клучните земјоделски, градежни и други индустриски активности сè уште се дозволени, но зголемените рестрикции предизвикаа загриженост во врска со снабдувањето со храна.
