Самопрогласената „Народна република Луганск“ во источна Украина, поддржана од Русија, наскоро би можела да одржи референдум за приклучување кон Русија, изјави локалниот лидер Леонид Пашечник, пренесуваат проруските локални медиуми.
„Сите лажни референдуми одржани на привремено окупираните територии се неважечки и нема да имаат правна основа“, изјави за Ројтерс портпаролот на украинското Министерство за надворешни работи Олег Николенко.
„Напротив, Русија ќе се соочи со уште посилен одговор од меѓународната заедница, што дополнително ќе ја продлабочи нејзината глобална изолација“, рече тој.
Русија минатиот месец ги призна самопрогласените републики Луганск и Доњецк како независни и набргу потоа нареди, како што ја нарече, мировна операција во регионот.
На 24 февруари Русија испрати десетици илјади војници во Украина во „специјална операција“ за демилитаризација на јужниот сосед и искоренување на луѓето кои ги нарече опасни националисти.
Украинските сили пружија силен отпор, а Западот воведе сеопфатни санкции кон Русија во обид да ја принуди да ги повлече своите сили.
