„На влезот во Мариупол се поставени сменети патокази“, се вели во вчерашното соопштение на Министерството за транспорт на самопрогласената Народна Република Доњецк.
Министерството објави слики на општински работници во портокалови елеци што носат патна табла на која пишува Мариупол на украински и англиски и поставуваат сличен знак на руски.
„Работата за промена на патната сигнализација низ ослободената територија ќе продолжи“, се вели во соопштението и се додава дека слични работи биле извршени и во помалите населени места.
Мариупол е еден од најпогодените градови во Украина и руските сили со недели се обидуваат да преземат целосна контрола.
Во четвртокот, Сергеј Кириенко, првиот заменик-шеф на администрацијата на претседателот Владимир Путин, го посети сега срамнетиот град и другите „ослободени територии“, соопшти еден од сепаратистичките лидери на социјалните мрежи.
Локалните жители сакаа да видат доказ дека „Русија се врати овде засекогаш“, напиша Денис Пушилин, шеф на отцепениот украински регион Доњецк.
Заземањето на стратегиски лоцираниот пристаништен град ќе ѝ овозможи на Москва да создаде копнен мост меѓу сепаратистичките проруски региони во источна Украина и Крим, кој го анектираше во 2014 година.
Големата фабрика за челик Азовстал во Мариупол стана последниот џеб на отпорот, при што украинските трупи го поставија последниот став таму, вели Москва тајмс и додава дека стотици цивили со недели се заробени под силно бомбардирање, а многумина се засолнети во подземните тунели на таа централа од советската ера.
