Портпаролката на Белата куќа Џен Псаки им кажа на новинарите дека „САД никогаш не ја исклучиле“ опцијата за пружање помош на земјите од источното крило „пред да дојде до каква било руска инвазија“ на Украина.
Околу 8.500 целосно спремни американски војници се во состојба на висока готовност за да можат да се распоредат во краток рок. Веста ја објави Пентагон, а ја пренесуваат најголемите светски агенции.
Неименуван дипломат на НАТО кажал за Ројтерс дека САД размислуваат за преместување на дел од своите војници сместени во Западна Европа кон исток во претстојните недели.
„Станува збор за американски војници кои веќе се наоѓаат во Европа“, кажал дипломатот, кој го потврдил извештајот на Њујорк тајмс во кој пишува дека американскиот претседател Џо Бајден размислува за испраќање американски војници на Балтикот и источноевропските сојузници.
НАТО денес соопшти дека ги става силите во состојба на готовност и дека ја снабдува Источна Европа со повеќе воени бродови и авиони, што Русија го осуди како ескалација на тензиите.
Дипломатот кажал дека потенцијалното преместување на војниците ќе биде постепено и дека до пополнувањето на дупките на НАТО во источното крило може да дојде во следните недели.
