Руски падобранци ја чуваат нуклеарната централа во Чернобил заедно со Украинската национална гарда, соопшти во саботата руското Министерство за одбрана објавувајќи видео на кое наводно се гледаат војници од двете сили како ги чуваат просториите.
Руските сили „постигнаа договор“ со баталјонот на Украинската национална гарда за заштита на нуклеарната централа, се вели во соопштението на прес-службата на Министерството. Војниците на двете нации моментално ја осигуруваат безбедноста во единиците на електраната, складиштата за гориво и заштитната купола изградена над саркофагот на уништениот четврти реактор, се додава.
Двеминутното видео објавено од министерството ја прикажува областа околу електраната и луѓе вооружени со автомати. На снимката се гледаат и двајца мажи во воена униформа, едниот со украинско знаме на раката, како разговараат за безбедносните камери и детекторите за движење во областа.
[video:https://www.youtube.com/watch?v=Z4u7QrTVEp8 autoplay:0]Според руското Министерство за одбрана, персоналот на централата работи нормално, а локацијата и понатаму е безбедна. На видеото се гледаат и луѓе што се чини дека се вработени во електраната и воен персонал, кои го мерат нивото на радијација.
На видеото се слуша човек за кој се чини дека е руски воин како вели дека нуклеарната средина се следи шест пати на ден и дека ситуацијата останува под контрола.
Нуклеарната централа Чернобил беше местото на најголемата нуклеарна катастрофа во историјата, во 1986 година, кога нејзиниот четврти реактор почна да се топи. Џиновскиот челичен саркофаг, за кој биле потребни години да се изгради, сега ја покрива дотраената структура околу осакатениот реактор, кој долги години ќе остане радиоактивен.
Руските сили во четвртокот ја презедоа контролата врз областа, која се наоѓа на северот на Украина, недалеку од границата со Белорусија, откако претседателот Владимир Путин почна инвазија на Украина.
Украинската нуклеарна агенција и Министерството за внатрешни работи во петокот тврдеа дека има зголемено ниво на радијација од местото на нефункционалната електрана. Ројтерс објави дека зголемувањето можеби е предизвикано од радиоактивната прашина во областа што се кренала поради тешката опрема што се движи низ областа.
