Русија повеќе нема да работи со партнери како НАСА и Европската вселенска агенција на лебдечката лабораторија, објави на социјалните мрежи шефот на Роскосмос, Дмитриј Рогозин. Тој рече дека до раководството на Русија ќе биде доставен распоред на завршувањето на заедничката работа.
ИСС е последниот преостанат значаен вселенски проект на кој Русија работи со тие партнерски вселенски агенции, откако другите лансирања и работа беа откажани по руската инвазија на Украина. Но тој останува веројатно најважниот, бидејќи е дом за голем број астронаути и неговата орбита мора постојано да се одржува за да се избегне станицата да падне на Земјата.
Рогозин, на пример, се закани дека санкциите може да ја нарушат таа работа и да предизвикаат станицата да „падне во морето или на копно“.
Засега, сепак, вселенските агенции вклучени во работата на станицата од копно во голема мера продолжија да работат нормално во текот на војната. Русија, на пример, минатата недела безбедно го врати астронаутот на НАСА Марк Ванде Хеи на Земјата – и покрај сугестиите дека можеби ќе одбие – и работата на ИСС и нејзината орбита продолжи.
Меѓутоа, во март Рогозин ги повика вселенските агенции од целиот свет да ги повлечат санкциите кон компаниите од руските ракетни и вселенски индустрии за да гарантираат дека работата на ИСС ќе продолжи. Тој за тоа даде рок до крајот на месецот.
Тие одговорија без никакви знаци дека тие санкции ќе бидат укинати, но со посветеност кон продолжувањето на работата на вселенската станица, пренесува британски Индипендент.
„Позицијата на нашите партнери е јасна: санкциите нема да бидат укинати“, напиша Рогозин на Твитер. „Во исто време, плашејќи се од уништување на соработката на ИСС, каде што улогата на Русија е од фундаментално значење за да се обезбеди одржливост и безбедност на станицата, западните партнери јасно ставаат до знаење дека во реалноста, санкциите во однос на работата во интерес на ИСС нема да функционираат.“
„Сметам дека оваа состојба на работите е неприфатлива. Санкциите од САД, Канада, Европската Унија и Јапонија се насочени кон блокирање на финансиските, економските и производствените активности на нашите високотехнолошки претпријатија“, продолжи тој.
Тој тогаш рече дека санкциите се толку остри што соработката нема да се смета за можна сѐ додека се во сила.
„Верувам дека обновувањето на нормалните односи меѓу партнерите во Меѓународната вселенска станица и другите заеднички проекти е можно само со целосно и безусловно укинување на незаконските санкции“, заклучи тој.
„Конкретни предлози на Роскосмос за времето на завршување на соработката во рамките на ИСС со вселенските агенции на Соединетите Американски Држави, Канада, Европската Унија и Јапонија ќе бидат испратени до раководството на нашата земја во блиска иднина.“
