Дуров сè уште не коментирал за извештајот, но во последните денови Телеграм отфрли низа обвинувања од Русија дека апликацијата е засолниште за криминални активности и дека е компромитирана од западни и украински разузнавачки служби, пренесува Ројтерс.
„Постапките на основачот на Телеграм, П. Дуров, се предмет на кривична истрага според член 205.1, став 1.1 од Кривичниот законик на Русија, што се однесува на помагање на терористички активности“, се вели во написот на весникот Росијскаја газета, за кој се наведува дека е „заснован на материјали од руската ФСБ“.
Телеграм, кој има повеќе од милијарда активни корисници ширум светот, не одговори веднаш на барањето на Ројтерс за коментар.
Рускиот државен регулатор за комуникации претходно воведе ограничувања за Телеграм, кој е исклучително популарен во Русија за јавни и приватни комуникации, наведувајќи го како причина неуспехот на компанијата да отстрани екстремистичка содржина.
Москва истовремено се обидува да ги охрабри Русите да се префрлат на државната апликација MАКС, која беше лансирана пред речиси една година.
