По состанокот на Советот за безбедност на Русија, претседателот Владимир Путин најави дека денеска ќе донесе одлука дали да ги признае двете самопрогласени отцепени републики Доњецк и Луганск во украинскиот регион Донбас, разорен од војна.
Говорејќи на крајот од седницата, за време на која владините министри и шефот на безбедносните агенции на земјата тврдеа дека хуманитарната ситуација преку границата се влошува, Путин рече: „Ги слушнав вашите мислења. Денеска ќе биде донесена одлука“.
Меѓу членовите на советот што повикаа Кремљ да го поддржи признавањето на териториите под контрола на бунтовниците беше и министерот за одбрана Сергеј Шојгу, кој тврдеше дека украинските владини сили може да распоредат тактичко нуклеарно оружје и тврдеше дека Киев се подготвува со сила да го реши проблемот во источниот дел на земјата.
Ако Русија ги признае бунтовничките региони, оцени Ројтерс, тоа би можело на Москва да ѝ овозможи таму отворено да испрати воени сили, користејќи го аргументот дека интервенира како сојузник за да ги заштити од Украина.
