„Не разбирам зошто ЕУ одамна не одлучи да ја прошири Шенген зоната кон земјите од Западен Балкан за да можеме да ја браниме нашата Европа на море од шверцери кои ги злоупотребуваат овие луѓе и им ветуваат подобар живот, а само им ги земаат парите“, рече Бабиш.
Премиерот Бабиш објави дека на агендата на првата работна седница на новата чешка влада во вторник ќе бидат вклучени и итни европски прашања.
„Ќе ги отфрлиме новите дозволи за емисии од ЕТС2 бидејќи станува збор за нов зелен данок, ќе го отфрлиме пактот за миграција, ова ослободување за нас за кое слушаме е само за една година“, рече Бабиш, додавајќи дека на претстојниот самит на ЕУ ќе учествува и на состанокот на земјите што ги отфрлаат новите европски решенија за миграцијата, организиран од Данска, додека во среда ќе се сретне со лидерите на земјите од Западен Балкан.
Новиот чешки премиер нагласи дека тој и неговата партија АНО отсекогаш се бореле за интересите на Европа, но дека ЕУ сега ја губи конкурентноста и не решава проблеми како што се енергетиката, даночното затајување или царинските малверзации.
Кога станува збор за европскиот пристап кон војната во Украина, Бабиш рече дека Чешка сигурно ќе продолжи со хуманитарната помош за Украина и ќе ја поддржи целата помош што доаѓа во Украина од повеќегодишниот буџет на ЕУ, но не се изјасни дали ќе го прифати или ќе го отфрли предлогот за користење на замрзнатите руски средства за помош на Украина.
„Доаѓа Божиќ. Би било убаво ако европските лидери и Зеленски и Путин, се договорат за прекин на огнот и си постават цел на тажната четврта годишнина од агресијата на Путин врз Украина, мислам на 24 февруари… војната да заврши и сите страни да добијат безбедносни гаранции“, рече Бабиш.
Новиот чешки премиер додаде дека е лошо што илјадници војници умираат во Украина секоја недела.
„Секоја војна е лоша и треба да се потсетиме на Втората светска војна, која однесе огромен број жртви. Европа и сите земји учеснички можеби треба да почнат да зборуваат за мир, а не за војна, бидејќи сите не сакаме војна“, рече Бабиш.
