Руските вооружени сили објавија дека руските војници отвориле оган врз „украинска диверзантска и извидничка група“ што се обидела да премине во земјата, убивајќи пет војници и уништувајќи ги нивните возила.
Во соопштението објавено денеска воените началници велат дека „единица на Јужниот воен округ, заедно со граничната патрола на руската Федерална служба за безбедност, спречила диверзантско-извидувачка група да ја наруши руската државна граница од територијата на Украина“, пренесе РТ.
Во престрелката загинаа пет украински војници, а ниту еден руски војник не беше повреден, објавија тие. Министерството додаде дека за време на нападот, две борбени возила на вооружените сили на Киев преминале на руска територија во обид да ги спасат наводните диверзанти. Се наведува дека и двете возила се уништени.
Одговарајќи на извештаите за нападот, украинската војска соопшти дека тврдењата на Москва за обид за упад на диверзанти се лажни.
Водачите на двете бунтовнички републики во петокот тврдеа дека имаат разузнавачки информации дека Киев е подготвен да нареди офанзива со цел повторно да ги заземе сепаратистичките региони, кои прогласија автономија откако владата на земјата беше соборена во 2014 година.
Украина инсистира дека нема планови да изврши инвазија на Донбас, а во петокот Алексеј Данилов, секретар на Советот за национална безбедност и одбрана на Украина, тврдеше дека „има обид да се испровоцираат нашите сили“, додавајќи дека украинските трупи „може да отворат оган само ако има закана за животите на нашите војници“.
